މީގެ ކުރިން ދިރާސީ އާ އަހަރު ފަށަމުން އައީ ކޮންމެ އަހަރެއްގެ ޖެނުއަރީ މަހުގެ ތެރޭގަ އެވެ. އެކަމަކު، ކޯވިޑު-19ގެ ސަބަބުން ތައުލީމީ ދާއިރާއަށް ގެނައި ބަދަލުތަކާ ގުޅިގެން ދިރާސީ އާ އަހަރު ފެށުން އޮގަސްޓް މަހަށް ފަސްކޮށްލީ އެވެ. އެ ނިންމުން ދާއިމީ ކުރަން މިނިސްޓްރީން ވަނީ ނިންމައިފަ އެވެ.
އެޑިއުކޭޝަން މިނިސްޓްރީން ވަނީ އަންނަ އޮގަސްޓުން ފެށިގެން އަންނަ އަހަރުގެ އޮގަސްޓް މަހާ ހަމައަށް ކިޔެވުން ކުރިއަށްގެންދާނެ ގޮތުގެ ތާވަލު އާންމުކޮށްފައެވެ. އޭގައިވާ ގޮތުން ދިރާސީ އާ އަހަރު ފެށުމަށް ފަހު އެންމެ ފުރަތަމަ މިޑްޓާމް ބަންދެއް ލިބޭނީ އޮކްޓޯބަރުން 17 އިން ފެށިގެން އޮކްޓޯބަރު 21 އަށެވެ. އަހަރުގެ ފުރަތަމަ ޓާމުގެ ޓެސްޓަށްފަހު ޑިސެމްބަރު 23، 2021 ގައި ސްކޫލުތައް ބަންދުވާނެ އެވެ.
ދެ ވަނަ ޓާމުގެ ކިޔެވުން ފަށާނީ އަންނަ އަހަރުގެ ޖެނުއަރީ 16 ގަ އެވެ. އޭޕްރީލް މަހުގެ ފުރަތަމަ ހަފުތާގައި މިޑްޓާމަށް ސްކޫލުތައް ބަންދުވާނެ އެވެ. އެއަށްފަހު އަންނަ އަހަރުގެ ޖޫން 30 ގައި ދެ ވަނަ ޓާމަށް ބަންދުވާނެ އެވެ. މަސް ދުވަހުގެ ޗުއްޓީއަކަށްފަހު އަންނަ އަހަރުގެ ދިރާސީ އާ އަހަރުގެ ކިޔެވުން ފަށާނީ އޮގަސްޓް 7، 2022 ގަ އެވެ.
ދިރާސީ އަހަރު ބަދަލުކުރުމާ ގުޅޭގޮތުން އެޑިއުކޭޝަން މިނިސްޓަރު ޑރ. އައިޝަތު އަލީ މީގެ ކުރިން ވިދާޅުވީ އޮގަސްޓްގައި ދިރާސީ އަހަރު ފެށުމުން ދަރިވަރުންނަށް ވަރަށް ބޮޑު ފައިދާއެއް ކުރާނެ އެވެ. ތަރައްގީވެފައިވާ ބައެއް ގައުމުތަކުގައި ވެސް ދިރާސީ އަހަރު ފަށަނީ އެ ދުވަސްވަރުގައި ކަމަށް، ނިއުސް ކޮންފަރެންސެއްގައި މިނިސްޓަރު ވިދާޅުވި އެވެ.
އެ ކަމަނާ ވިދާޅުވި ގޮތުގައި ދިރާސީ އަހަރުގެ ކިޔެވުން ފަށާ ދުވަސްވަރު ބަދަލުކުރީ ވަރަށް ގިނަ ފަރާތްތަކެއްގެ މަޝްވަރާއަށްފަހުގަ އެވެ.
