ރ. ވާދޫ ޕްރިޕެއަރިންގ އައުޓަރ އައިލެންޑް ފޯރ ސަސްޓެއިނެބަލް އެނާރޖީ ޑިވެލޮޕްމެންޓް ޕްރޮޖެކްޓްގެ ބިޑް ހުށައެޅުމަށް އަންނަ މަހު ހުޅުވާލެވޭނެ ކަމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން މައުލޫމާތު ދީފިއެވެ.

މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ އެންވަޔަރަންމަންޓް ޑިޕާޓްމަންޓްގެ ޑިރެކްޓަރ ޖެނެރަލް އަހުމަދު އަލީ ވިދާޅުވީ، ރ. ވާދޫ ޕްރިޕެއަރިންގ އައުޓަރ އައިލެންޑް ފޯރ ސަސްޓެއިނެބަލް އެނާރޖީ ޑިވެލޮޕްމެންޓް ޕްރޮޖެކްޓް މިހާރު އޮތީ ޓެންޑާކުރުމުގެ މަރުހަލާގައި ކަމަށެވެ. އަދި އަންނަ ޖުލައި މަހުގެ 1 ވަނަ ދުވަހު ބިޑް ހުށައެޅުމަށް ހުޅުވާލެވޭނެ ކަމަށް އޭނާ ވިދާޅުވިއެވެ.

މި ޕްރޮޖެކްޓަކީ އޭ.ޑީ.ބީގެ ހިލޭ އެހީ އާއި އީ.އައި.ބީގެ ލޯނު އެހީ، މޯލްޑިވްސް ގްރީން ފަންޑް އަދި އޭ.ޑީ.ބީ ލޯނު އެހީގައި ކުރިއަށް ގެންދާ ޕްރޮޖެކްޓެކެވެ.

އިޢާދަކުރަނިވި ހަކަތައިގެ ބައިން ރ. ވާދޫ ހިމެނޭހެން އެކި ރަށްތަކުގައި ހިންގާ ޕްރިޕެއަރިންގ އައުޓަރ އައިލެންޑް ފޯރ ސަސްޓެއިނެބަލް އެނާރޖީ ޑިވެލޮޕްމެންޓް މަޝްރޫޢުއަށް ޖުމުލަ 246.8 މިލިޔަން ރުފިޔާ ވަނީ ބަޖެޓްކޮށްފައެވެ. މީގެ ތެރޭގައި އޭޝިއަން ޑިވެލޮޕްމަންޓް ބޭންކުގެ ހިލޭ އެހީން 164.2 މިލިޔަން ރުފިޔާ އަދި ޔޫރިޕިއަން އިންވެސްޓްމަންޓް ބޭންކުގެ ލޯނުގެ ގޮތުގައި 40.3 މިލިޔަން ރުފިޔާ ހިމަނާފައިވެއެވެ.