މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށްގެން ބާއްވާ ލިޓަސް ގައުމީ ބިލިއާޑް މުބާރާތުގެ ފިރިހެން ފުރަތަމަ ޑިވިޝަންގެ ޗެމްޕިއަންކަން ރ. ވާދު ނޫރާނީގެ އަށް ނިސްބަތްވާ ހުސައިން ފަޔާޒް ހޯދައިފިއެވެ.

މި މުބާރާތުގެ ފިރިހެން ފުރަތަމަ ޑިވިޝަންގެ ޗެމްޕިއަންކަން ފަޔާޒް ހޯދީ އަންގާރަ ދުވަހުގެ ރޭ ކުޅުނު ފައިނަލް މެޗުން މޮޅުވެގެންނެނެވެ.

ފައިނަލް މެޗުގެ ކުރިން އެމްޕީބީއޭ ރޭންކިންގެ ދެވަނައިގައި އޮތް ފަޔާޒް ވަނީ އެ ދުވަހުގެ ހަވީރު ސެމީ ފައިނަލުގައި ވާދަކޮށްފައެވެ. ސެމީގައި ފަޔާޒް ނުކުތީ ރޭންކިންގެ އެއްވަނައިގައި އޮތް ހަސަން ޝާޒް މުހައްމަދާ ދެކޮޅަށެވެ. އެ މެޗު އެ މެޗު 6-9 ފްރޭމުން ކާމިޔާބުކޮށް، ފަޔާޒް ވަނީ ފައިނަލުގެ ޖާގައެއް ކަށަވަރުކޮށްފައެވެ.

އަންގާރަ ދުވަހުގެ ރޭ ކުޅުނު ފިރިހެން ފުރަތަމަ ޑިވިޝަންގެ ފައިނަލުގައި ފަޔާޒް ނުކުތީ ރޭންކިންގެ ހަވަނައިގައި އޮތް މުހައްމަދު ޝާހިލް ހަމީދާ ދެކޮޅަށެވެ. ޝާހިލްއަކީ އެއްވެސް މެޗަކުން ބަލިނުވެ، ފައިނަލުން ޖާގަ ހޯދި ކުޅުންތެރިއެކެވެ. މެޗު 7-11 ފްރޭމުން ކާމިޔާބުކޮށް، ޗެމްޕިއަންކަން ހޯދީ ފަޔާޒެވެ.

މިދިޔަ ބުދަ ދުވަހުން ފެށިގެން މިމަހުގެ 15ގެ ނިޔަލަށް ކުރިއަށްގެންދާ ”ލިޓަސް ނޭޝަނަލް ބިލިއާޑް ޗެމްޕިއަންޝިޕް 2021″ގައި ހަ އިވެންޓެއް ކުރިއަށްދާނެއެވެ. އެއީ ޓީމު އިވެންޓާއި ފިރިހެން ފުރަތަމަ ޑިވިޝަނާއި ފިރިހެން ދެވަނަ ޑިވިޝަނާއި އަންހެން ޑިވިޝަނާއި ޑަބަލްސް އިވެންޓް އަދި މިކްސް ޑަބަލްސްއެވެ.