ރ. މަޑުއްވަރީގައި މިއަދު ހިނގި އެކްސިޑެންޓެއްގައި އެރަށު ކައުންސިލްގެ ސެކްރެޓަރީ ޖެނެރަލް އަހްމަދު އަސްލަމް (40) އަވަހާރަވެއްޖެއެވެ.

އެ ހާދިސާ ހިނގީ ކައުންސިލްގެ ޕިކަޕް ފަހަތަށް ޖެއްސުމުގެ ތެރޭގައި ޕިކަޕް ފަހަތުގައި އެސްޖީ އަސްލަމް ހުންނަވަނިކޮށް ފާރާއި ޕިކަޕްދޭތެރޭ ފިތިގެން ކަމަށްވެއެވެ.

މިހާދިސާ ފުލުހުންނަަށް މިއަދުގެ މެންދުރު ރިޕޯޓުކޮށްފައިވާ ކަމަށާއި އޭނާ ”ނިޔާވީ“ އުނގޫފާރު ރީޖިނަލް ހޮސްޕިޓަލަށް ގެންގޮސް ފަރުވާދެމުން ދަނިކޮށް ކަމަށް ފުލުހުން ބުނެފައިވެއެވެ.

އަސްލަމަށް އެންމެ ފުރަތަމަ ފަރުވާ ދިނީ މަޑުއްވަރީގައި ހުންނަ ސިއްހީ މަރުކަޒުގައެވެ. އަދި ފަހުން ވަނީ އުނގޫފާރު ރީޖަނަލްސް ހޮސްޕިޓަލަށް ގެންގޮސްފައެވެ. އޭނާ އަވަހާރަވީ އެ ހޮސްޕިޓަލުގައި ފަރުވާ ދެމުން ދަނިކޮށެވެ.

އޭނާއަށް ބޮޑެތި އަނިޔާތަކެއް ލިބިފައިވާ ކަމަށް ”ވާދޫ ލައިވް“އާ ވާހަކަދެއްކި މައުލޫމާތު އެނގޭ ފަރާތަކުންވަނީ މައުލޫމާތު ދީފައެވެ.

އޭނާ މަޑުއްވަރީ ކައުންސިލްގެ އެސްޖީކަމާ ހަވާލުވީ 2022ވަނަ އަހަރުގެ ނޮވެމްބަރު މަހުގެ 16ވަނަ ދުވަހުއެވެ.