މާޅޮސްމަޑުލު އުތުރުބުރީ އަތޮޅު ކައުންސިލުން ރ. އަތޮޅުގެ ރަށްރަތަކަށް ހުޅުވާލައިގެން ބާއްވާ ހޭންބޯލް މުބާރާތް މިފެށޭ ނޮވެމްބަރުމަހުގެ 4 ވާ ހޮނިހިރު ދުވަހު ފެށުމަށް ތާވަލުކޮށްފިއެވެ.

ޖުމުލަ ހަތަރު ޓީމަކުން މިއަހަރު ވާދަކުރާ ރ. އަތޮޅުގެ ހޭންޑްބޯލް ޢީދު ފަށާނީ ރ. އުނގޫފާރުގައެވެ. މިމުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އެރަށުގައެވެ.

ރ. އަތޮޅު ކައުންސިލްގެ ރައީސް ހުސައިން ނާސިފް ވިދާޅުވީ، މުބާރާތް ހޯސްޓުކުރަން ޝައުގުވެރިކަން ފާޅުކުރަން ހުޅުވާލި ފުރުސަތުގައި އެއްވެސް ރަށަކުން އެ ޝައުގުވެރިކަން ފާޅުކޮށްފައިނުވާތީ އާއި އަތޮޅުގެ މެދުތެރޭގެ ރަށެއްގައި މުބާރާތް ބާއްވަން ފެންނާތީ އަތޮޅުގެ ވެރިކަންކުރާ ރަށް އުނގޫފާރުގައި މުބާރާތް ބާއްވާ ގޮތަށް ހަމަޖެއްސީ ކަމަށެވެ.

މިމުބާރާތުގެ ޗެމްޕިއަން އަދި ރަނަރ-އަޕް ޓީމަށް ޖުމުލަ ބައިލައްކަ ރުފިޔާގެ ފައިސާގެ އިނާމު ދޭނެ ކަމަށް ނާސިފް ފާހަގަކުރެއްވިއެވެ. މުބާރާތުގެ އެކިއެކި ވަނަތަކާއި މަގާމުތައް ހޯދާ ކުޅުންތެރިންނަށް މެޑައްޔާއި ޓްރޯފީގެ އިތުރުން ހަނދާނީ ލިޔުން ދޭނޭ ކަމަށް ނާސިފް ވިދާޅުވިއެވެ.

މިމުބާރާތުގައި ވާދަކުރަން ހުޅުވާލި ފުރުސަތުގައި، މުބާރާތަށް ޝައުގުވެރިކަން ފާޅުކޮށް ވާދަކުރަން ހުށަހެޅީ، ރ. އިނގުރައިދޫއާއި ރ. މަޑުއްވަރީގެ އިތުރުން ރ. ހުޅުދުއްފާރު އަދި ރ. އަނގޮޅިތީމުންނެވެ.

މިހަތަރު ރަށް ތަމްސީލުކުރާ ޓީމުތައް ވާދަކުރާ މިމުބާރާތް ކުރިއަށްދާނީ ނޮވެމްބަރުމަހުގެ 8 ގެ ނިޔަލަށެވެ.

އެންމެ ފުރަތަމަ މެޗުގައި ވާދަކުރާނީ، މަޑުއްވަރީ އާއި އިނގުރައިދޫއެވެ. މިމެޗް އޮންނާނީ ނޮވެމްބަރު 4 ވަނަ ދުވަހުގެ ހަވީރު 15:45ގައެވެ. ހަމަ އެދުވަހުގެ ހަވީރު 16:45 ގައި ހުޅުދުއްފާރާއި އަނގޮޅިތީމު ބައްދަލުކުރާނެއެވެ.

ޖެހިގެން އަންނަ ދުވަހުގެ ހަވީރު 15:45ގައި މަޑުއްވަރީ އާއި ހުޅުދުއްފާރު އަދި 16:45ގައި އިނގުރައިދޫ އާއި އަނގޮޅިތީމު ބައްދަލުކުރާ މެޗު އޮންނާނެއެވެ.

ނޮވެމްބަރު މަހުގެ 6 ވަނަ ދުވަހުގެ އޮންނާނީ ހަވީރު 15:45ގައި އިނގުރައިދޫ އާއި ހުޅުދުއްފާރު އަދި 16:45ގައި މަޑުއްވަރީ އާއި އަނގޮޅިތީމު ބައްދަލުކުރާ މެޗު ކުޅޭނެއެވެ.

މިމުބާރާތުގެ ފައިނަލް މެޗު އޮންނާނީ ނޮވެމްބަރު 8 ވަނަ ދުވަހުއެވެ.