ރ. އުނގޫފާރުގައި މިހާރު ކުރިއަށްދާ ރ. އަތޮޅު ހޭންޑްބޯލް މުބާރާތް 2023ގެ ތިންވަނަ މެޗުގައި ރ. މަޑުއްވަރީގެ ހޭންޑްބޯލް ޓީމާ ވާދަކޮށް ރ. ހުޅުދުއްފާރު ކުރި ހޯދައިފިއެވެ.

މިމެޗުން ހުޅުދުއްފާރު މޮޅުވެފައިވަނީ، 5-7 ގެ ނަތީޖާއަކުންނެވެ.

މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ނުވަތަ ކްއީން އޮފް ދަ މެޗުގެ ލަގަބު ލިބިފައިވަނީ ހުޅުދުއްފާރު ޓީމުގެ ޖާޒީ ނަމްބަރު 17 އައިޝަތު މަރީޝާ އަށެވެ.

މިނަތީޖާއާއެކު މަޑުއްވަރީ މިވަނީ މުބާރާތުން ކަޓާފައެވެ.

ޖުމުލަ ހަތަރު ޓީމަކުން މިއަހަރު ވާދަކުރާ ރ. އަތޮޅުގެ ހޭންޑްބޯލް މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އުނގޫފާރުގައެވެ.

ފާހަގަކޮށްލަންޖެހޭ ގޮތުގައި،  04 ނޮވެމްބަރ 2023 ގައި ފެށި މިމުބާރާތުގެ އޯޕެނިން މެޗުތަކުގެ ތެރެއިން ދެވަނަ މެޗުގައި ރ. ހުޅުދުއްފާރުގެ ހޭންޑްބޯލް ޓީމުވަނީ ރ. އަނގޮޅިތީމާ ވާދަކޮށް ބަލިވެފައެވެ. މިއަދު އެޓީމުން ވާދަކުރި މަޑުއްވަރީވަނީ މިމުބާރާތުގެ ފުރަތަމަ މެޗުގައި ރ. އިނގުރައިދޫ އަތުންވެސް ބަލިވެފައެވެ.

މިމުބާރާތުގައި ވާދަކުރަން ހުޅުވާލި ފުރުސަތުގައި، މުބާރާތަށް ޝައުގުވެރިކަން ފާޅުކޮށް ވާދަކުރަން ހުށަހެޅީ، ރ. އިނގުރައިދޫއާއި ރ. މަޑުއްވަރީގެ އިތުރުން ރ. ހުޅުދުއްފާރު އަދި ރ. އަނގޮޅިތީމުންނެވެ.

މިހަތަރު ރަށް ތަމްސީލުކުރާ ޓީމުތައް ވާދަކުރާ މިމުބާރާތް ކުރިއަށްދާނީ ނޮވެމްބަރުމަހުގެ 8 ގެ ނިޔަލަށެވެ.

އެންމެ ފުރަތަމަ މެޗުގައި ވާދަކުރީ، މަޑުއްވަރީ އާއި އިނގުރައިދޫއެވެ. އަދި ދެވަނަ މެޗުގައި ހުޅުދުއްފާރާއި އަނގޮޅިތީމު ބައްދަލުކޮށްފައިވާއިރު ތިންވަނަ މެޗުގައި މަޑުއްވަރީ އާއި ހުޅުދުއްފާރު އަދި ހަތަރުވަނަ މެޗުގައި އިނގުރައިދޫ އާއި އަނގޮޅިތީމު ބައްދަލުކޮށްފައިވެއެވެ.

މިއީ އިއްޔެ ކުޅެން ހަމަޖެހުނު މެޗުތަކެއް ނަމަވެސް މޫސުން ތަންނުދިނުމުގެ ސަބަބުން ކެންސަލްކުރީއެވެ.

ދެން މިމުބާރާތުގައި ކުޅޭނީ އިނގުރައިދޫ އާއި ހުޅުދުއްފާރު އަދި މަޑުއްވަރީ އާއި އަނގޮޅިތީމެވެ.