ރ. އުނގޫފާރުގައި މިހާރު ކުރިއަށްދާ ރ. އަތޮޅު ހޭންޑްބޯލް މުބާރާތް 2023ގައި ކުޅުނު ދެވަނަ މެޗުންވެސް އަނގޮޅިތީމުގެ ހޭންޑްބޯލް ޓީމު މޮޅުވެއްޖެއެވެ.
މިމެޗުން އަނގޮޅިތީމު މޮޅުވީ، ފުަރަތަމަ މެޗުގައި މޮޅުވި ރ. އިނގުރައިދޫ ޓީމާ ވާދަކޮށެވެ. ވާދަވެރި ކުޅުމެއް ފެނިގެންދިޔަ މިމެޗުން އަނގޮޅިތީމު މޮޅުވީ 13-7 ގެ ބޮޑު ފަރަގަކުންނެވެ.
މިއީ މިމުބާރާތުގައި މިހާތަނަށް އެންމެ ގިނަ ގޯލްޖެހިތަން ފެނިގެންދިޔަ މެޗެވެ. މިނަތީޖާއާއެކު ތާވަލުގެ އެއްވަނައިގައި އޮތީ އަނގޮޅިތީމެެވެ. އަދި އެޓީމުންމިވަނީ ކުޅުނު ދެމެޗުން މޮޅުވެ ފައިނަލުން ޖާގައެއް ކަށަވަރުކޮށްފައެވެ.
މި މެޗުގެވެސް އެންމެ މޮޅު ކުޅުންތެރިއަކަށް ހޮވިފައިވަނީ ނުވަތަ ކްއީން އޮފް ދަ މެޗުގެ ލަގަބު ލިބިފައިވަނީ ހުޅުދުއްފާރު އަތުން މޮޅުވި މެޗުގައިވެސް އެޝަރަފު ހޯދި އަނގޮޅިތީމު ހޭންޑްބޯލް ޓީމުގެ ޖާޒީ ނަންބަރު 9 ފާޠިމަތު ރިޝްމާ އަށެވެ.
ޖުމުލަ ހަތަރު ޓީމަކުން މިއަހަރު ވާދަކުރާ ރ. އަތޮޅުގެ ހޭންޑްބޯލް މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އުނގޫފާރުގައެވެ.
މިމުބާރާތުގައި ވާދަކުރަން ހުޅުވާލި ފުރުސަތުގައި، މުބާރާތަށް ޝައުގުވެރިކަން ފާޅުކޮށް ވާދަކުރަން ހުށަހެޅީ، ރ. އިނގުރައިދޫއާއި ރ. މަޑުއްވަރީގެ އިތުރުން ރ. ހުޅުދުއްފާރު އަދި ރ. އަނގޮޅިތީމުންނެވެ.
މިހަތަރު ރަށް ތަމްސީލުކުރާ ޓީމުތައް ވާދަކުރާ މިމުބާރާތް ކުރިއަށްދާނީ ނޮވެމްބަރުމަހުގެ 8 ގެ ނިޔަލަށެވެ.
އެންމެ ފުރަތަމަ މެޗުގައި ވާދަކުރީ، މަޑުއްވަރީ އާއި އިނގުރައިދޫއެވެ. އަދި ދެވަނަ މެޗުގައި ހުޅުދުއްފާރާއި އަނގޮޅިތީމު ބައްދަލުކޮށްފައިވާއިރު ތިންވަނަ މެޗުގައި މަޑުއްވަރީ އާއި ހުޅުދުއްފާރު އަދި ހަތަރުވަނަ މެޗުގައި އިނގުރައިދޫ އާއި އަނގޮޅިތީމު ބައްދަލުކޮށްފައިވެއެވެ.
މިއީ އިއްޔެ ކުޅެން ހަމަޖެހުނު މެޗުތަކެއް ނަމަވެސް މޫސުން ތަންނުދިނުމުގެ ސަބަބުން ކެންސަލްކުރީއެވެ.
ދެން މިމުބާރާތުގައި ކުޅޭނީ އިނގުރައިދޫ އާއި ހުޅުދުއްފާރު އަދި މަޑުއްވަރީ އާއި އަނގޮޅިތީމެވެ.
