ރ. އުނގޫފާރުގައި މިހާރު ކުރިއަށްދާ ރ. އަތޮޅު ހޭންޑްބޯލް މުބާރާތް 2023ގައި ކުޅުނު ހުރިހާ މެޗަކުން މޮޅުވެ، ފައިނަލަށް ދަތުރުކުރި ހަމައެކަނި ޓީމުގެ ޝަރަފު ރ. އަނގޮޅިތީމަށް ލިބިއްޖެއެވެ.

ފައިނަލުގެ ކުރިން އަނގޮޅިތީމުން ކުޅުނު އެންމެ ފަހު މެޗުގައި މިއަދު ބައްދަލުކުރީ މުބާރާތުގެ އެއްވެސް މެޗަކުން ކުރި ނުހޯދި ކަޓާފައިވާ ރ. މަޑުއްވަރީއާއެވެ. މަޑުއްވަރީ ޓީމާ ވާދަކޮށް އަނގޮޅިތީމު މޮޅުވީ 9-11 ގެ ކުޑަ ފަރަގަކުންނެވެ.

މި މެޗުގެވެސް އެންމެ މޮޅު ކުޅުންތެރިއަކަށް ހޮވިފައިވަނީ ނުވަތަ ކްއީން އޮފް ދަ މެޗުގެ ލަގަބު ލިބިފައިވަނީ ހުޅުދުއްފާރު އަތުން މޮޅުވި މެޗުގައި އަދި އިނގުރައިދޫ އަތުން މޮޅުވި މެޗުގައިވެސް އެޝަރަފު ހޯދި އަނގޮޅިތީމު ހޭންޑްބޯލް ޓީމުގެ ޖާޒީ ނަންބަރު 9 ފާޠިމަތު ރިޝްމާ އަށެވެ.

މިމުބާރާތުގައި ޖެހިޖެހިގެން ތިން ކުއީން އޮފް ދަ މެޗުގެ ޝަރަފު އަދި އެންމެ ގިނައިން މިލަގަބު ހޯދި ކުޅުންތެރިޔަކީ ރިޝްމާއެވެ.

މިމުބާރާތުގައި ފެށުނީއްސުރެ އެންމެ ތަފާތު ކުޅުމެއް ފެނިފައިވަނީ ހަމަ ޔަގީނުންވެސް ރިޝްމާގެ ފަރާތުންނެވެ. އަނގޮޅިތީމު ޓީމުގެ ސަޕޯޓަރުން ބުނާ ގޮތުގައި ”ރިޝްމާ އަތެއް ނުވާނެ“ އެވެ.

ޖުމުލަ ހަތަރު ޓީމަކުން މިއަހަރު ވާދަކުރި ރ. އަތޮޅުގެ ހޭންޑްބޯލް މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އުނގޫފާރުގައެވެ.

މިމުބާރާތުގައި ވާދަކުރަން ހުޅުވާލި ފުރުސަތުގައި، މުބާރާތަށް ޝައުގުވެރިކަން ފާޅުކޮށް ވާދަކުރަން ހުށަހެޅީ، ރ. އިނގުރައިދޫއާއި ރ. މަޑުއްވަރީގެ އިތުރުން ރ. ހުޅުދުއްފާރު އަދި ރ. އަނގޮޅިތީމުންނެވެ.

މިމުބާރާތުގެ ފައިނަލް މެޗު އޮންނާނީ ބުރާސްފަތު ދުވަހުގެ ހަވީރު 3:45 ގައެވެ. މިމެޗުގައި ބައްދަލުކުރާނީ ރ. ހުޅުދުއްފާރާއި ރ. އަނގޮޅިތީމެވެ.