ރ. އުނގޫފާރުގައި ކުރިއަށްދިޔަ ރ. އަތޮޅު ހޭންޑްބޯލް މުބާރާތް 2023 ގެ ފައިނަލް މެޗުގައި ރ. ހުޅުދުއްފާރު ބަލިކޮށް، ރ. އަނގޮޅިޓީމުން މުބާރާތުގެ ޗެމްޕިއަންކަން ހޯދައިފިއެވެ.
ވާދަވެރި ކުޅުމެއް ފެނިގެންދިޔަ ފައިނަލް މެޗުގެ ފުރިހަމަ ވަގުތު ހަމަހަމަކޮށް ނިމުމުން، ނަތީޖާ ނެރެން ޖެހުނީ 5 މިނިޓުގެ އިތުރު ދެ ހާފު ކުޅެގެންނެވެ. މި މެޗު އަނގޮޅިތީމުން ކާމިޔާބުކުރީ 11-7 ގެ ނަތީޖާއަކުންނެވެ.
ހަމަހަމަ ކުޅުމެއް ފެނިގެންދިޔަ މިމެޗުގައި ފަޔަށް އަނިޔާ ލިބިފައިވީ ނަމަވެސް ހުޅުދުއްފާރު ޓީމުގެ ކީޕަރުގެ ހުށިޔާރުކަން ފާހަގަވެގެންދިޔައެވެ.
މެޗުގައި ފުރަތަމަ ލަނޑުޖަހައި ކުރި ހޯދީ އަނގޮޅިތީމުންނެވެ. އަދި ފުރަތަމަ ހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން އަނގޮޅިތީމު ކުރީގައި އޮވެގެންނެވެ.
މެޗުގެ ދެވަނަ ހާފު ހުޅުދުއްފާރުން ވަރުގަދަކޮށް ފެށިއިރު މިހާފުގެ ވަރަށް ކުރީކޮޅު އެޓީމުން ވަނީ ލަނޑެއް ކަމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މެޗުގެ ލީޑު ނެގުމަށް ހުޅުދުއްފާރަށް ފުރުސަތު ލިބިގެންދިޔަ ނަމަވެސް ފުރުސަތުތައް ވަނީ ބޭކާރުވެފައެވެ.
ނަމަވެސް އަނގޮޅިތީމުން މިހާފުގައި އިތުރު ހަތް ލަނޑު ކާމިޔާބުކުރިއިރު ހުޅުދުއްފަހަރަށް ކާމިޔާބުކުރެވުނީ އިތުރު ތިން ލަނޑެވެ.
މެޗުގެ ކުޅުން ނިމިގެންދިޔައީ 7-11 ގެ ނަތީޖާއަކުން އަނގޮޅިތީމު ކުރީގައި އޮވެގެންނެވެ.
ދެޓީމުންވެސް ފެނުނީ ވަރަށް ވަރުގަދަ އެޓޭކިން ގޭމެއް ކުޅެމުންދިޔަ މަންޒަރެވެ.
އަނގޮޅިތީމު މިމުބާރާތުގެ ފައިނަލަށް ދަތުރުކުރީ އެއްވެސް މެޗަކުން ބަލި ނުވެ އެ ޝަރަފާއެކުއެވެ.
މުޅި މުބާރާތުން އެންމެ ފާހަގަ ކޮށްލެވުނު ކުޅުންތެރިޔަކީ އަނގޮޅިތީމު ހޭންޑްބޯލް ޓީމުގެ ޖާޒީ ނަންބަރު 9 ފާޠިމަތު ރިޝްމާއެވެ. ކުއީން އޮފް ދަ ޓޯނަމަންޓްގެ އިތުރުން އޭނާއަށް ވަނީ އެންމެ ގިނަ ގޯލްޖެހި ކުޅުންތެރިޔާގެ ޝަރަފު ލިބިފައެވެ.
ރިޝްމާ ފާހަގަކުރެވުނީ ކުޅުނު ހުރިހާ މެޗެއްގެ ވެސް ރާނީގެ ގޮތުގައެވެ.
ޖުމުލަ ހަތަރު ޓީމަކުން މިއަހަރު ވާދަކުރި ރ. އަތޮޅުގެ ހޭންޑްބޯލް މުބާރާތުގެ ހުރިހާ މެޗެއްވެސް ކުޅެފައިވަނީ އުނގޫފާރުގައެވެ.
މިމުބާރާތުގައި ވާދަކުރަން ހުޅުވާލި ފުރުސަތުގައި، މުބާރާތަށް ޝައުގުވެރިކަން ފާޅުކޮށް ވާދަކުރީ، ރ. އިނގުރައިދޫއާއި ރ. މަޑުއްވަރީގެ އިތުރުން ރ. ހުޅުދުއްފާރު އަދި ރ. އަނގޮޅިތީމެވެ.
