ޒަޔަނިސްޓް އިސްރާއީލުން ދެމުން އަންނަ އުދުވާނީ ހަމަލާތަކުގައި ގެދޮރުގެއްލި ހާލުގައި ޖެހިފައިވާ މީހުންނަށް އެހީތެރިވުމަށް، ފަލަސްޠިން ފަންޑަށް 106،514 ރުފިޔާ ހަދިޔާކޮށް ރ. އަނގޮޅިތީމު ރައްޔިތުން ނަމޫނާ ދައްކައިފިއެވެ.

އަނގޮޅިތީމު ކައުންސިލުން އިސްނަގައިގެން އ.ތ.މ.ކޮމެޓީއާއި، ކުލަބު ޖަމިއްޔާތަކާއި، ރަށުގެ މުއައްސަސާތަކާއި، ރައްޔިތުން ގުޅިގެން ފަލަސްޠީނަށް އެހީތެރިވުމުގެ ގޮތުން ކުރިއަށް ގެންދިޔަ ފަންޑު ހޯދުމުގެ ހަރަކާތްތަކުން ލިބުނު ފައިސާ ޖަމާކޮށްފައިވަނީ އިންޓަނޭޝަނަލް އެއިޑް ކެމްޕެއިން (އައިއޭސީ)ގެ ފަލަސްޠީން ފަންޑަށެވެ.

މިދިޔަ މަހުގެ 25 ވަނަ ދުވަހު އަނގޮޅިތީމު ރައްޔިތުންގެ ފަރާތުން، ހާލުގައި ޖެހިފައިވާ ފަލަސްތީނުގެ މުސްލިމުންނަށް އެހީތެރިވުމަށްޓަކައި ފުޑް ފެއާއެއްވެސް ވަނީ ބާއްވާފައެވެ. އެ މަހުގެ 13 ވަނަ ދުވަހު ”ފަލަސްތީނާއެކު އަނގޮޅިތީމު“ މިނަމުގައި ފަލަސްތީނުގެ ރައްޔިތުންނާއެކު އަނގޮޅުތީމު ރައްޔިތުން ތިބިކަން އަންގައިދިނުމަށް ހިނގާލުމެއް ބާއްވާފައި ވެއެވެ.

އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދާ އުދުވާންތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 11,200 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 29,000 އަރާއިރު، ޣައްޒާގެ ގެދޮރާއި އެހެން ޢިމާރާތްތަކުގެ 45 އިންސައްތަ މިހާރު ވަނީ ސުންނާފަތިކޮށް ބިނާ ހަމަކޮށްލާފައެވެ.