މިއަހަރުގެ މަސްވެރިންގެ ދުވަހުގެ މުނާސަބަތުގައި މާޅޮސްމަޑުލު އުތުރުބުރީ ވާދޫ ކައުންސިލުން އިންތިޒާމުކޮށްގެން މަސްރޭހެއް ބާއްވަން ނިންމައި އެކަން އިއުލާންކޮށްފިއެވެ.

މާޅޮސްމަޑުލު އުތުރުބުރީ ވާދޫ ކައުންސިލްގެ އިދާރާއިން ކުރި އިއުލާނެއްގައި ބުނީ، މަސްވެރިންގެ ދުވަހުގެ މުނާސަބަތުގައި މަސްރޭހެއް ބޭއްވުމަށް ކައުންސިލުން ނިންމާފައިވާ ކަމަށެވެ. އަދި މި މަސްރޭސް ކުރިއަށްދާނީ 9 ޑިސެމްބަރ 2023ވާ ހޮނިހިރު ދުވަހުގެ ހެނދުނު 7:00 އިން ހަވީރު 5:00 އަށް ކަމަށްވެސް ވާދޫ ކައުންސިލުން ވަނީ ބުނެފައެވެ.

މިރޭހުގައި ބައިވެރިވުމަށް ބޭނުންވާ ފަރާތްތަކުން މިފެށޭ ޑިސެމްބަރު މަހުގެ 5ވާ އަންގާރަ ދުވަހުގެ 14:00 ގެ ކުރިން އެކަމަށް އެދޭ ފޯމު، ރ. ވާދޫ ކައުންސިލްގެ އިދާރާއަށް ހުށަހެޅުމަށް އެ ކައުންސިލްގެ އިއުލާނުގައިވަނީ އެދިފައެވެ. މިމުބާރާތުގައި ބައިވެރިވުމަށް އެދޭ ފޯމާއި އަދި މުބާރާތުގެ އުސޫލު ”މަސްބޭނުމުގެ މުބާރާތާއި ބެހޭ އުޞޫލު – 2023/04/299“ އެ ކައުންސިލްގެ އިދާރާއިން ލިބެން ހުންނާނެއެވެ.

މިމުބާރާތް ސްޕޮންސަރ ކުރުމަށާއި، އެކިވަނަތަކަށް އިނާމު ހުށަހެޅުމުގެ ފުރުސަތުވެސް ވަނީ ހުޅުވާލާފައެވެ. މިގޮތުން މިކަމަށް ޝައުގުވެރިވާ ފަރާތްތަކަށް 5 ޑިސެމްބަރ 2023ވާ އަންގާރަ ދުވަހުގެ 14:00 ގެ ނިޔަލަށް އެފުރުސަތު އޮންނާނެ ކަމަށް ވާދޫ ކައުންސިލުން ބުނެއެވެ.

މިކަމާ ގުޅިގެން އިތުރު މައުލޫމާތު ހޯދުމަށް ވާދޫ ކައުންސިލްގެ އިދާރާއަށް ގުޅުމަށް އެކައުންސިލުން އެދެއެވެ.

މިދިޔަ އަހަރުވެސް ވާދޫ ކައުންސިލުން ވަނީ މަސްވެރިންގެ ދުވަހާ ގުޅުވައިގެން މަސްރޭހެއް ބާއްވާފައެވެ. މިދިޔަ އަހަރުގެ މަސްރޭހަށް ބޮޑު ތަރުޚީބެއް ލިބިފައިވެއެވެ.

މަސްވެރިންގެ ދުވަސް ފާހަގަކުރަނީ ކޮންމެ އަހަރެއްގެ ޑިސެމްބަރު 10 ގަ އެވެ. މި އަހަރު ފާހަގަކުރާނީ 43 ވަނަ މަސްވެރިންގެ ދުވަހެވެ.