މަޑުއްވަރީ ބަނދަރުގެ ދަތިކަން ހައްލުކުރުމަށް، މަޑުއްވަރީގައި އާ ބަނދަރެއް ތަރައްގީކުރުމުގެ މަސައްކަތް ސަރުކާރުން ފެށީ 2019ވަނަ އަހަރުގެ ފަހުކޮޅުއެވެ. އެމަސައްކަތް ސަރުކާރުން ހަވާލުކުރީ އެމްޓީސީސީއާއެވެ.

މަޑުއްވަރިއަކީ އިންޑަސްޓްރިއަލް ފެންވަރުގައި ފައިބަރު މަސައްކަތްވެސް ކުރާ ރަށެކެވެ. މިއާއެކު ރަށުގައި ބޭނުންކުރާ އުޅަނދުތައް އަންނަނީ ދުވަހެއް ދުވަހަކަށް އިތުރުވަމުންނެވެ. މަޑުއްވަރީގެ އާ ބަނދަރު ހެދީ ރަށުގެ ދެކުނުކޮޅުގައެވެ.

މަޑުއްވަރީގައި މިހާރު އޮތް އައު ބަނދަރަކީ 1200 ފޫޓު ދިގު، 350 ފޫޓު ފުޅާ ބަނދަރެކެވެ. މި ޕްރޮޖެކްޓުގެ ދަށުން 7280 ކިއުބިކް މީޓަރ ސަރަހައްދެއްގެ ނެރު ފުންކުރުމާއި، 80400 ކިއުބިކް މީޓަރ ސަރަހައްދެއްގެ ބަނދަރު ފުންކުރުމާއި، 65520 ކިއުބިކް މީޓަރ ސަރަހައްދެއްގެ ހާބަރ ބޭސިން ފުންކުރުމުގެ މަސައްކަތްކޮށްފައި ވެއެވެ.

މީގެއިތުރުން ޕްރޮޖެކްޓްގައި 411 މީޓަރު ބޭރުތޮށިލުމާއި، 135 މީޓަރުގެ ސަރަޙައްދެއްގައި ރިވެޓްމަންޓް ޖެހުމުގެ އިތުރުން 2840 އަކަމީޓަރުގެ ސަރަހައްދެއްގައި ޕޭމެންޓް ހެދުން ވެސް ހިމަނައި މަސައްކަތްވަނީ ނިންމާފައެވެ.

ޒަމާނީ ފެންވަރަށް ތަރައްގީކުރި މި ބަނދަރުގައި ކޮޅުވެއްޓިއާއި ބާޖު ފަދަ އުޅަނދުތައް ކައިރިކުރުމަށް ރޭމްޕަކާއި 2825 އަކަމީޓަރުގެ ޕޭމަންޓް، އަދި ބަނދަރު ބައްތި ހިމެނެއެވެ.

2500 އަށްވުރެ ބޮޑު އާބާދީއެއް އޮންނަ މަޑުއްވަރީގައި ކުރިއަށްގެންދިޔަ ބަނދަރު ޕްރޮޖެކްޓަކީ ސަރުކާރުން 72.6 މިލިއަން ރުފިޔާ ޚަރަދުކޮށްގެން ކުރިއަށްގެންދިޔަ މަޝްރޫއެކެވެ.