ފަންޑިތަ އާއި ސިހުރު ހަދާ މީހުންގެ އެހީތެރިކަން ނުހޯދުމަށް ފިގުހު އެކަޑަމީން އިލްތިމާސްކޮށްފިއެވެ.

ފިގުހު އެކަޑަމީން ނެރުނު ބަޔާނެއްގައި ބުނީ މި ފަހަކަށް އައިސް ރާއްޖޭގެ ބައެއް ހަބަރުފަތުރާ ވަސީލަތްތައް މެދުވެރިކޮށް އިސްލާމްދީނުގައި ވަރަށް ބޮޑު ފާފައެއްގެ ގޮތުގައި ހަރާމްކޮށްފައިވާ ސިހުރު ހެދުމަށް ހިތްވަރު ލިބޭ ގޮތަށް ބަޔަކު މަސައްކަތް ކުރަމުންދާ ކަމަށެވެ.

އެފަދަ މީހުންގެ ގާތަށް ގޮސް ހުއްދަ ރުގްޔާގެ ނަމުގައި ފަނޑިތައިގެ އެހީ ލިބިގަތުމަކީ ހަރާމް ކަމަކަށް ވާތީ އެފަދަ މީހުންގެ ގާތަށް ނުދިއުމަށް ފިގްހު އެކަޑަމީއިން އިލްތިމާސްކުރެ އެވެ.

އިސްލާމީ އަގީދާގައި ބަލިތަކުން ޝިފާ ލިބުމަށާއި ހަޔާތުގެ ކަންކަން ރަނގަޅު ކުރުމަށް އެދި ﷲ ސުބަހާނަހޫ ވަތައާލާ ފިޔަވައި އެހެން ފަރާތްތަކަކުން އެހީ ހޯދުމާއި ފަންޑިތަައިގެ އެހީ ލިބިގަތުމަކީ ހަރާމް ކަމެއް ކަމަށް އެ ބަޔާނުގައިވެއެވެ. އެހެންވެ، އެފަދަ މީހުންގެ ގާތަށް ނުދިއުމަށް ވެސް ވަނީ އެދިފައެވެ.

”ސިހުރު ހެދުމަކީ އިސްލާމްދީނުގެ ސާފު ތެދުމަގުން ރައްޔިތުން އެއްކިބާވެ، ހިދާޔަތުގެ ތެދު މަގުން ނެއްޓި މަގުފުރެދިދާނެ ކަމަކަށްވާތީ އެފަދަ ތަކެތި ރައްޔިތުންނަށް ފެންނާނެހެން ހަބަރުފަތުރާ ވަސީލަތްތަކުން ނުފެތުރުމަށް އިލްތިމާސް ކުރަން“ އެ ބަޔާނުގައިވެއެވެ.

ސިހުރާއި ފަންޑިތަ ހެދުމަކީ އަޅުގަނޑުމެންގެ މި ކުޑަ ދިވެހި މުޖްތަމައުގައި މިހާރު ވަރަށް އާންމުވެފައިވާ ކަމެކެވެ. އެކަމުގެ ސަބަބުން އެތައް ބައެއްގެ އާއިލާ ބިކަވެ، ވިއްސިވިހާލިވެންދާ އިރު، ބައެއް މީހުން ބަލި އެނދުގައި އޮންނަން ޖެހޭ ފަހަރު ވެސް އާދެއެވެ. އަދި އަނެއް ބަޔަކު ދުނިޔެއާ ވަކިވާން ޖެހޭ ފަހަރު ވެސް އާދެއެވެ. ފަންޑިތައާއި ސިހުރު ހެދުމަކީ ރާއްޖޭގައި މަނާ ކޮށްފައިވާ ކަމެކެވެ.