ރ. އުނގޫފާރަށް ދިމާވެފައިވާ ބިމުގެ މައްސަލައަށް ހައްލެއް ހޯދުމަށް ހިންގާ ބިން ހިއްކުމުގެ މަޝްރޫއަށް، ރޭ ފަތިހު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ – އެމްޓީސީސީގެ ކޮންނަ ބޯޓު މަހާޖައްރާފު އެ ރަށަށް ބަނދަރު ކޮއްފިއެވެ.
މިއީ މަރާމާތަށް މަހާޖައްރާފު ގިނަ ދުވަސްތަކެއް ވަންދެން ބޭނުންނުކޮށް އޮތުމަށްފަހު ކުރާ ފުރަތަމަ މަސައްކަތެވެ.
ރަސްމީކޮށް އެ ރަށުގެ ބިން ހިއްކުމުގެ މަޝްރޫއު ފެށުމަށް އެމްޓީސީސީއާއި އެ ރަށު ކައުންސިލުން ދަނީ ތައްޔާރީތައް ވަމުންނެވެ.
ރ. އުނގޫފާރު ފަޅުތެރޭގައި އުޅަނދުތަކެއް
އުނގޫފާރުގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތް އެމްޓީސީސީއާ ހަވާލުކުރީ ރައީސް އިބްރާހިމް މުޚައްމަދު ޞާލިޙްގެ ސަރުކާރުގައި 2021 ވަނަ އަހަރުގެ ޖަނަވަރީ 31 ވަނަ ދުވަހުއެވެ. ބިން ހިއްކުމާ ގޮނޑުދޮށް ހިމާޔަތް ކުރުމުގެ މަޝްރޫއު ހަވާލުކޮށްފައި ވަނީ 240 ދުވަސްތެރޭ ނިންމާގޮތަށް، 75.3 މިލިއަން ރުފިޔާ އަށެވެ.
2017 ވަނަ އަހަރުގެ ޖެނުއަރީ މަހުގެ ތެރޭގައި މޫދަށް ބާލާފައިވާ މަހާޖައްރާފުގެ ދިގުމިނުގައި 92.95 މީޓަރު އަދި ފުޅާމީނުގައި 16.30 މީޓަރު ހުރެއެވެ. އަދި 50 މީޓަރުގެ އަޑިން ވެލި ނެގުމުގެ ގާބިލުކަން ލިބިފައިވާއިރު އެއްފަހަރާ 3700 ކިއުބިކް މީޓަރުގެ ވެލި ބަރު ކުރެވެއެވެ. މި އުޅަނދު ބަނުމަށް އެމްޓީސީސީން 36 މިލިއަން ޑޮލަރު (555 މިލިއަން ރުފިޔާ) ހޭދަ ކުރިއެވެ. މި އުޅަނދު ބަނުމުގެ މަސައްކަތް ކުރީ ނެދަލެންޑްސްގެ އައިއެޗްސީއާ ހަވާލުކޮށްގެން ޗައިނާގެ ނަންޓޮން ރެއިންބޯ މެރިން ޓެކްނޮލޮޖީ ބޯޓު ޔާޑުގައެވެ.
