މިނިސްޓްރީ އޮފް ކްލައިމެޓް ޗޭންޖް, އެންވަޔަރަންމަންޓް އެންޑް އެނަރޖީ އަދި ވޭސްޓް މެނޭޖްމަންޓް ކޯޕަރޭޝަން ގުޅިގެން ސަރަހައްދީ ފެންވަރުގައި ކުނި މެނޭޖްކުރުން ހަރުދަނާކުރުމާ ގުޅޭ ފޯރަމްއެއް ރ. ދުވާފަރުގައި ބާއްވައިފިއެވެ.
ޒޯން 2ގެ 45 ރަށަކުން އަތޮޅު ކައުންސިލްތަކާއި ރަށު ކައުންސިލްތަކުން 96 ބައިވެރިންނާއެކު ދެ ދުވަހުގެ މުއްދަތަށް ދުވާފަރުގައި ކުރިއަށްގެންދިޔަ މި ފޯރަމް އޮތީ މިދިޔަ ޖުލައި މަހުގެ 30 އިން 31 ގެ ނިޔަލަށެވެ.
މި ފޯރަމްގެ މައިގަނޑު އެއް ބޭނުމަކީ ވޭސްޓް މެނޭޖްމަން ކޯޕަރޭޝަންގެ ފަރާތުން މިރަށްތަކުގެ ކުނި މެނޭޖްކުރުމުގައި ދިމާވާ ދަތިތައް ފާހަގަކޮށް އެކަމަށް ދާއިމީ ހައްލެއް ހޯދުމަށް މަޝްވަރާކުރުމާއި ސަރަހައްދީ ފެންވަރުގައި ޒޯން 2ގެ ކުނި މެނޭޖްކުރުމުގެ މަސައްކަތް ރޭވިފައިވާ ގޮތާ ބެހޭ މައުލޫމާތުން ބައިވެރިންނާ ހިއްސާކުރުމެވެ.
މީގެ އިތުރުން މިހާރު ވެމްކޯއާ އެކީ ކުނި މެނޭޖްކުރުމުގެ އެއްބަސްވުމުގައި ސޮއިނުކޮށް ހުރި ރަށްރަށް އެފުރުސަތު ފަހިކޮށްދިންނުން ހިމެނެއެވެ.
މިފޯރަމަކީ މިސަރުކާރުން ކުރިއަށްގެންދާ ’މަގޭ ސާފު ރާއްޖެ‘ ޕްރޮގްރާމްގެ ދަށުން ދިވެހި ދައުލަތުގެ ބަޖެޓުންނާއި ވަރލްޑް ބޭންކުގެ ހިލޭ އެހީގައި ހިންގާ މޯލްޑިވްސް ކްލީން އެންވަޔަރަންމަންޓް ޕްރޮޖެކްޓުން އިސްނަގައިގެން ކުރިއަށްގެންދާ ހަރަކާތެކެވެ.
ދުވާފަރުގައި ކުރިއަށްގެންދިޔަ މި ފޯރަމްގެ އިންތިޒާމްތައް ހަމަޖެއްސުމުގައި އިސްވެ ހަރަކާތްތެރިވީ ރ. ދުވާފަރު ކައުންސިލްގެ ފަރާތުންނެވެ.
Leave a Reply