މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ކުރިއަށްގެންދަ ”ޙާލު ކިހިނެއް؟“ ޕްރޮގްރާމުގެ ތެރެއިން ރ. އަތޮޅުގެ ފުރަތަމަ ފިޔަވަހި ނިންމާލައިފިއެވެ.

އެ މިނިސްޓްރީ ބުނީ، ”ޙާލު ކިހިނެއް؟“ ޕްރޮގްރާމުގެ ތެރެއިން ރ. އަތޮޅުގެ ފުރަތަމަ ފިޔަވަހި ނިންމާލާފައިވާ ކަމަށާއި މި ޕްރޮގްރާމުގެ ފުރަތަމަ ފިޔަވަހީގައި އެ އަތޮޅުގެ ގަތް ރަށުގައި ކުރިއަށް ގެންގޮސް މީހުން ދިރިއުޅޭ ހުރިހާ ގެތަކަށް ޒިޔާރަތްކޮށްފައިވާ ކަމަށެވެ.

އެގޮތުން ފައިނުން 60 ގެއަށާއި ކިނޮޅަހުގެ 74 ގެއަށް އަދި ހުޅުދުއްފާރުުން 173 ގެއަކާއި މީދޫގެ 254 ގެއެއްގެ އިތުރުން އުނގޫފާރުން 224 ގެއާއި އިނގުރައިދޫގެ 225 ގެއަކަށް ވަނީ ޒިޔާރަތްކޮށް މައުލޫމާތު ނަގާފައެވެ.

މި ޕްރޮގްރާމުގެ ދަށުން ޖުމްލަ 1010 ގޭބީސީއަށް ޒިޔާރަތްކޮށްފައިވާއިރު، މި ޕްރޮގްރާމުގެ ތެރެއިން ދައުލަތުގެ ޚާއްސަ އެހީތެރިކަން ބޭނުންވާ ފަރާތްތައް ދެނެގަނެ، އެ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ވަނީ ފަށާފައެވެ.

މި ޕްރޮގްރާމު ކުރިއަށް ގެންދިއުމަށް، ރ އަތޮޅު ކައުންސިލާއި، ރަށްރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާއި، ސަރުކާރުގެ އިދާރާތަކުން ދެއްވި އެއްބާރުލުން މިނިސްޓްރީން ފާހަގަކުރެއެވެ.

ޙާލު ކިހިނެއް ޕްރޮގުރާމް ފަށާފައިވަނީ މިއަހަރުގެ މެއިމަހުގެ 30 ވަނަ ދުވަހުއެވެ. މި ޕްރޮގްރާމުގެ މައިގަނޑު ބޭނުމަކީ ދައުލަތުގެ ޚާއްސަ ސަމާލުކަމާއި ރައްކާތެރިކަން ބޭނުންވާ މީހުން ދެނެގަނެ، އެމީހުންނަށް ބޭނުންވާ އެހީތެރިކަން ފޯރުކޮށްދިނުމެވެ.

މި ޕްރޮގްރާމްގެ ތެރެއިން އާއްމުން އެންމެ ގިނައިން ހުށައަޅާފައިވަނީ އަސާސީ ޚިދުމަތްތަކާއި ބޯހިޔާވަހިކަމުގެ ދަތިކަމުގެ މައްސަލަތަކެވެ.

މީގެ އިތުރުން ބޭސްފަރުވާއަށް އޭހީތެރިކަން ބޭނުންވުމާއި އިޖުތިމާޢީ ރައްކާތެރިކަމުގެ ނިޒާމުގެ ތެރެއިން މާލީ އެހީ ހޯދުމުގެ މައްސަލަތަކާއި ޑޮކްޓަރަށް ދެއްކުމާއި ރާއްޖެއިން ބޭރުން ބޭސް ގެނައުންފަދަ ކަންކަމުގައި ދިމާވާ ދަތިތަށް، އާންމުން ފާހަގަކުރާކަމަށް މިނިސްޓްރީން ބުނެއެވެ.

މިކަންކަމާ ގުޅިގެން އިޖުތިމާޢީ އަދި އާއިލީ ތަރައްޤީއާއި ބެހޭ ވުޒާރާއިން ދަނީ މައްސަލަތައް ބަލައި، އެކަންކަމުގައި އެހީތެރިވެދީ ޙައްލުތައް ހޯދައިދެމުންނެވެ. މިގޮތުން ބައެއް ޢާއިލާތަކަށް ކެއަރ ޕެކޭޖު ފޯރުކޮށްދެމުން ގެންދާކަން މިނިސްޓްރީން ފާހަގަކުރެއެވެ.