ނަސްރުގެ ދުވަސް ފާހަގަ ކުރުމުގެ ގޮތުން ދިވެހިރާއްޖޭގެ އަސްކަރިއްޔާ، އެމްއެންޑީއެފް އިން މިއަދު ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. މި ހަރަކާތްތަކުގެ ތެރެއިން އެންމެ ގިނަ ބަޔަކު ބައިވެރިވި އެއް ހަރަކާތަކީ މިއަދު ހަވީރު ޖުމްހޫރީ މައިދާނުގައި ބޭއްވި އަސްކަރީ ހުށަހެޅުންތަކެވެ. މި ހުށަހެޅުންތައް ބަލައިލުމަށް ގިނަ އަދަދެއްގެ އާންމު ރައްޔިތުން ވަޑައިގެންފައިވެއެވެ.

ޖުމްހޫރީ މައިދާނުގައި މި ހަރަކާތްތައް ކުރިއަށް ގެންގޮސްފައިވަނީ މިއަދު ހަވީރު 16:15 އިން ފެށިގެންނެވެ. މި ހަރަކާތްތަކަކީ 3 ނޮވެމްބަރުގެ ޢުދުވާނުގައި ދިވެހި ސިފައިންނާއި ރައްޔިތުން ދެއްކި ހިތްވަރާއި ޤައުމީ ރޫޙު އާލާކުރުމުގެ ގޮތުން ބޭއްވުނު ހަރަކާތްތަކެކެވެ. އާންމުނަށް ބައިވެރިވެވޭނެ ގޮތަށް ހަމަޖެހިފައިވާ މި ހުށަހެޅުންތައް ވަރަށް ކުލަގަދަ ކޮށް ކުރިއަށް ދިޔައެވެ.

ނަސްރުގެ ދުވަހުގެ ހަރަކާތްތައް ފެށުމުގެ ގޮތުން މިއަދު ސިފައިން ބައިވެރިވެގެން އިސްލާމީ މަރުކަޒުގައި ބޮޑު ޖަމާއަތުގައި ފަތިސް ނަމާދުކުރެވުނެވެ. ފަތިސް ނަމާދަށް ފަހު، މިއަދު ހެނދުނު 06:00 ގައި ތިނެއް ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ ރަސްމިއްޔާތު ވެސް ވަނީ ބާއްވާފައެވެ. މި ރަސްމިއްޔާތުތަކުގައި ސިފައިންގެ އިސްވެރިންނާއި ޢާންމު ރައްޔިތުން ބައިވެރިވިއެވެ.

މީގެ އިތުރުން ނަސްރުގެ ދުވަހުގެ ރަސްމީ ޖަލްސާ އެ ދުވަހުގެ ހެނދުނު 09:00 ގައި ސޯޝަލް ސެންޓަރުގައި ބޭއްވުނެވެ. މި ޖަލްސާގައި 3 ނޮވެމްބަރުގެ ދިފާޢުގައި ޝަހީދުވި ބަޠަލުންގެ ޖިހާދުގެ ހަނދާންތައް އާކޮށް، އެ ބޭފުޅުންގެ ޤުރުބާނީގެ މަތިން ހަނދާންކުރެވުނެވެ. މިއަދުގެ ހަރަކާތްތަކުން ދައްކުވައިދެނީ ޤައުމީ ދިފާޢުގައި ސިފައިން އަދާކުރާ މުހިންމު ދައުރާއި، ޤައުމީ އެއްބައިވަންތަކަމުގެ ރޫޙެވެ.