މިހާރު ދިވެހިރާއްޖެއަށް ކުރަމުންދާ ވިއްސާރައިގައި ރ. ވާދުއަށް ބޮޑެތި ގެއްލުންތަކެއް ވެއްޖެއެވެ.
މި ގޮތުން އިއްޔެ ރަށަށް ވަރަށް ބޮޑަށް އުދަ އަރާފަައިވާއިިރު، ބައެއް ގޭގެއަށާއި އާންމުންގެ ތަކެއްޗާއި މުދަލަށް ލޮނުގެ އަސަރުކޮށްފަައި ވެއެވެ.
ގޭގެއަށް ލޮނުގަނޑު ވަނުން ކޮންޓްރޯލް ކުރުމަށް ވާދޫގެ ރައްޔިތުން ވަނީ ގުޅިގެން މަސައްކަތްކޮށްފައެވެ. ރައްޔިތުން ނުކުމެ ގޭގޭގެ ދޮރުމަތީ ވެލިބަސްތާ ފަދަ ތަކެތި ޖަހާފައި ވެއެވެ. އަދި ލޮނުގަނޑު ހިންދުމަށް ބައެއް ތަންތަނުގައި ވަޅުގަނޑު ކޮނެފަަައިވެއެވެ.
އިއްޔެއަކީ އާދަޔާ ޚިލާފަށް ވައިބާރު ދުވަހެއްކަމުން ވާދޫ ކައުންސިލް އިދާރާގެ ގުދަނުގެ ފުރާޅުގެ ޓިނު ގަނޑު ވަނީ ވަޔާ އެއްލާލައިފައެވެ. އަދި ރަށުގެ އެކި ސަރަހައްދުތަކުން ގަސްގަސް ވެރިފަައިވެއެވެ.
ރާއްޖެއަށް މިހާރު ކުރަމުންދާ ވިއްސާރާގައި ވައިގަދަވެ ކަނޑުތައް ގަދަވާނެކަމަށް ލަފާކުރެވޭތީ ވާދޫ ހިމެނޭ ސަރަހައްދަށް ވަނީ ރީނދޫ އެލާޓް ނެރެފައެވެ. މެޓް އޮފީހުން އެލާޓް ނެރެފައިވަނީ ހއ އަތޮޅުން ފެށިގެން ވ އަތޮޅަށެވެ.
ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ކޮޅިގަނޑު ބާރުގަދަ ކޮޅިގަނޑަކަށް ބަދަލުވެ، އޭގެފަހުން ތޫފާނަކަށްވެސް ބަދަލުވުމުގެ ފުރުޞަތު އޮތްކަމަށް މޫސުމާއި ބެހޭ ޤައުމީ އިދާރާއިން ވަނީ ހާމަކޮށްފައެވެ. މެޓް އޮފީހުން ވިދާޅުވީ މިކޮޅިގަނޑު ޖެހެމުން ދާނީ އުތުރު ހުޅަނގުއުތުރަށް ރާއްޖެ އާއި ދުރަށްކަމަށާއި، އެ ކޮޅިގަނޑާއި ގުޅިގެން ރާއްޖޭގެ އަތޮޅުތަކުގެ މަތީގައި ގިނައަދަދަކަށް ބޯ ވިއްސާރަވިލާ އުފެދެމުންދެމުންދާކަމަށެވެ. އަދި ކުރިއަށް އޮތް 3 ދުވަހުވެސް ރާއްޖޭގެ ޞަރަޙައްދުގައި ޚާއްސަކޮށް އުތުރާއި މެދުތެރޭގެ ސަރަޙައްދުގައި ވައިގަދަވެ ކަނޑުތައް ގަދަވާނެކަމަށް މެޓް އޮފީހުން ވަނީ ލަފާކޮށްފައެވެ
