ވާދޫގައި އަޅާ ނަރުދަމާ ހޮޅި ގުޅުވާ ސާމާނު ރޭ ރ. ވާދުއަށް ބާލައިފި އެވެ.
ދިވެހި ސަރުކާރުގެ ޑޮމެސްޓިކް ބަޖެޓުން ހަރަދުކޮށްގެން ހިންގާ މި މަޝްރޫޢުއަކީ އަޒްރޯވާ މޯލްޑިވްސް ޕްރައިވެޓް ލިމިޓެޑް އާއި ވޯޓަރ އިންޖިނިއަރިންގ ސަރވިސަސް އެފް.ޒެޑް.އީ ގުޅިގެން ކުރިއަށް ގެންދާ މަޝަރޫޢުއެކެވެ. މި މަސައްކަތް އެ ކުންފުނިތަކަށް ހަވާލުކޮށްފައި ވަނީ މިނިސްޓްރީ އޮފް ނެޝަނަލް ޕްލޭނިންގެ، ފަރާތުންނެވެ.
މި މަޝްރޫޢުގެ ޑީޓެއިލްޑް ޑިޒައިންގެ 100 އިންސައްތަ އަދި އެޑްމިން ބިލްޑިންގ ގެ 81 އިންސައްތަ މަަސައްކަތް މިހާރު ވަނީ ނިމިފައެވެ.
މި މަސައްކަތަށް 19،274،086 (ނަވާރަ މިލިއަން ދުއިސައްތަ ހަތްދިހަ ހަތަރު ހާސް އަށްޑިހަ ރުފިޔާ) ޚަރަދުވާނެ ކަމަށް އަންދާޒާ ކޮށްފައި ވެއެވެ.
މި މަޝްރޫއުގެ ދަށުން، ފެނާއި ނަރުދަމާގެ ނިޒާމު ފަރުމާ ކުރުމާއި، ރަށުގައި ފެނާއި ނަރުދަމާގެ ވިޔުގަ އެޅުމާއި ނަރުދަމާގެ ޕަމްޕް ސްޓޭޝަން ގާއިމްކުރުން އަދި އާރއޯ ޕްލާންޓާއި ސްޓޯރޭޖް ޓޭންކް ބެހެއްޓުމުގެ އިތުރުން ސީ އައުޓް ފޯލް އެޅުމާއި އިދާރީ އޮފީސް ގާއިމްކުރުން އަދި ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުމުގެ މަސައްކަތް ކުރެވިގެންދާނެއެވެ.
މި އެއްބަސްވުންތަކުގައި ސޮއިކޮށްފައިވަނީ 12 ޖޫން 2019ގައި އެކަމަށްޓަކައި މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައެވެ. އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއި ކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫގު އެވެ.
