ކޯވިޑް-19 ފެތުރި، ނުރައްކާތެރި ހާލަތުގައި އޮތް ރ. އަލިފުށީގެ ރައްޔިތުންނަށް ޒަރޫރީ ގޮތުން އެހީތެރިކަން ފޯރުކޮށްދިނުމަށް އަލިފުށި ދާއިރާގެ މަޖިލިސް މެންބަރު މުޙައްމަދު ރަޝީދު ޙުސައިން (ބިގޭ) ފަރާތުން 50،000 (ބައި ލައްކަ) ދިވެހި ރުފިޔާ ހަދިޔާކޮށްފިއެވެ.

ރ. އަލިފުށީ ކައުންސިލުން ވަނީ، ކައުންސިލްގެ ނަންބަރު 7717700396004 އެކައުންޓަށް މި ފައިސާ ޖަމާކޮއްދެއްވާފައި ވާތީ، އަލިފުށީ ދާއިރާގެ ރައްޔިތުންނަށާއި މަޖިލީސް މެންބަރު މުޙައްމަދު ރަޝީދު ޙުސައިން (ބިގޭ) ޝުކުރު އަދާކޮށްފައެވެ. އަދ މިި ފައިސާ ޖަމާ ކޮށްފައި ވަނީ، އިއްޔެ (22 ޖޫން 2021)ގެ ވަގުތެއްގައި ކަމަށް އެ ކައުންސިލުން ހާމަކުރެއެވެ.

ފާއިތުވި 24 ގަޑިއިރު ރ. އަލިފުށިން ކޯވިޑް-19ށް އިތުރު މީހަކު ފައްސި ނުވެއެވެ. އަދި 18 ސުންކެއްގެ ނަތީޖާ ވަނީ ނައްސި ވެފައެވެ. ބަލިން ރަނގަޅުވީ 6 މީހުންނެވެ. މީގެ އިތުރުން އިއްޔެ ވަނީ އަލަށް 7 ސުންކެއް ނަގާފައެވެ. އަދި ތަކުރާރުކުރަންޖެހޭ ސުންކުގެ ގޮތުގައި2 ސުންކެއް ވެއެވެ.

އަލިފުށީ އިހާގެ ޖުމުލަ އަދަދުތަކަށް ބަލާއިރު، 1062 ސުންކެއް މިހާތަނަށް ނެގިފައި ވެއެވެ. އޭގެ ތެރޭން 232 ސުންކެއްގެ ނަތީޖާ ފައްސި ކަމަށް ދައްކާއިރު، 783 ސުންކެއް ވަނީ ބައްޔަށް ނައްސިވެފައެވެ. ނަތީޖާ ނުލިބި ޖުމުލަ 10 ސުންކެއް އެބަ ވެއެވެ. ބަލިން ރަނގަލުވި މީހުންގެ ޖުމުލަ 110 އަރާފައި ވާއިރު، ތަކުރާރުކުރަންޖެހޭ ސުންކުގެ އަދަދަކީ 39 އެކެވެ،

މި ވަގުތު އަލިފުށީގައި ތިބި ކޯވިޑް-19 ޖެހިފައިވާ މީހުންގެ އަދަދަކީ 122 އެވެ.