މޭ މަހު ކުރި ވިއްސާރާގައި ވި ގެލުންތަކުން އަރައިގަތުމަށް ރ. ހުޅުދުއްފާރު ހިމެނޭހެން ޖުމުލަ 13 ރަށަކަށް ސަރުކާރުން 1.4 މިލިއަން ރުފިޔާ ޚަރަދުކުރަން ނިންމައިފިއެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) މިއަދު ބުނީ ވިއްސާރައިގައި އެކި ވަރުގެ ގެއްލުން ލިބިގެން 21 ރަށަކުން ރިޕޯޓުކޮށްފައިވާ ކަމަށެވެ. އެއީ ގޭގެއަށް ގެއްލުން ލިބިގެން އަދި ދަނޑުބިންތަކާއި އާއްމު ހިދުމަތްދޭ ތަންތަނާއި އޮޑިހަރުގެ ތަކަށް ގެއްލުން ލިބިގެން 13 ރަށަކުންނެވެ.

އެ ރަށްތަކުން 562 ގެއެއްގެ އެސެސްމަންޓު ހެދުމަށްފަހު 384 ގެއަކަށް މާލީ އެހީދޭން ސަރުކާރުން ވަނީ ނިންމާފައިވެ އެވެ.

މިދިޔަ މަހު ކުރި ވިއްސާރައިގައި އެންމެ ބޮޑެތި ގެއްލުން ލިބިފައިވަނީ އައްޑޫ އާއި ފުވައްމުލަކަށެވެ. އޭގެ އިތުރުން ހއ. އުލިގަމު، ހއ. ދިއްދޫ، ހދ. ކުޅުދުއްފުށި، ހދ. ނެއްލައިދޫ، ނ. މަގޫދޫ އަދި ރ. ދުވާފަރަށް ވެސް ގެއްލުން ލިބިފައި ވެއެވެ.

އެންޑީއެމްއޭ އިން ބުނި ގޮތުގައި އެ އަށް ރަށުން، ހިފައި ގެންގުޅޭ ތަކެއްޗަށް 3.9 މިލިއަން ރުފިޔާ އަދި ގޭގެ އިމާރާތަށް 642،849ރ. ގެ ގެއްލުމާ އެކު މުޅި ޖުމްލަ 6 މިލިއަން ރުފިޔާގެ ގެއްލުން ލިބިފައިވެ އެވެ. ނަމަވެސް ހިފައިގެންގުޅޭ ތަކެއްޗަށް ލިބުނު ގެއްލުމަށް ސަރުކާރުން ދޭނީ ގެއްލުމުގެ 20 ޕަސެންޓެވެ. އެއީ 794،015ރ. އެވެ.

އިމާރާތަށް ލިބޭ ގެއްލުން 150،000ރ. އަށްވުރެ ކުޑަނަމަ އެ ގެއްލުމަށް ސަރުކާރުން އެއްކޮށް އެހީދޭނެ އެވެ.

އެހެންވެ، މި ވިއްސާރައިގައި އިމާރާތަށް ގެއްލުން ލިބިގެން އެއް ފަރާތަކަށް މާލީ އެހީގެ ގޮތުގައި އެންމެ ގިނަވެގެން ލިބޭނީ 150،000ރ. އެވެ.