ރ. ދުވާފަރު މަގުހެދުމުގެ މަޝްރޫޢުގެ ދެވަނަ ފިޔަވަހީގެ ދަށުން، ކޭބަލް ޖަންކްޝަން އެޅުމުގެ މަސައްކަތް ފެށިއްޖެ ކަމަށް އެ މަސައަކަތް ކުރާ މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

ދުވާފަރު މަގުތައް ޒަމާނީ ފެންވަރަކަށް ތަރައްގީކުރުމުގެ މި މަޝްރޫޢުގެ ދަށުން، 4,960 އަކަ މީޓަރުގެ ސަރަޙައްދެއްގައި ހިނގާ ސަރަޙައްދެއް ޤާއިމުކުރުމާއި، 17,790 އަކަ މީޓަރުގެ ސަރަޙައްދެއްގައި ދުއްވާ ސަރަޙައްދެއް ޤާއިމުކުރުމާއި، ފެންހިންދާ ނިޒާމެއް ޤާއިމުކުރުމާއި، ސަރވިސް ލައިން އެޅުމާއި މަގުބައްތި ހަރުކުރުމުގެ މަސައްކަތް ހިމެނެއެވެ.

ދުވާފަރުގެ ބޮޑެތި ހުރިހާ މަގެއްގައި ތާރުއެޅުގެ މަސައްކަތް ކުރުމަށް އެމްޓީސީސީއާއި ހަވާލުކުރީ މިދިޔަ އަހަރުގެ މެއި މަހުގެ 22 ވަނަ ދުވަހުއެވެ. ރ.ދުވާފަރުގެ މަގުތައް ހެދުމުގެ މަސައްކަތަކީ 28.2 މިލިއަން ރުފިޔާ ޚަރަދުވާ މަޝްރޫޢެކެވެ. މިމަސައްކަތް 240 ދުވަހުގެ ތެރޭގައި ނިންމަންޖެހޭ ކަމަށް އެގްރިމަންޓުގައި ބުނެފައިވެއެވެ.

ކޯވިޑް-19 ގެ ސަބަބުން ރާއްޖޭގެ އިޤްތިޞާދަށް އަންނަމުންދާ ހީނަރުކަމާއެކީގައިވެސް، ރާއްޖޭގެ ތަރައްޤީއަށް ސަރުކާރުން ކުރަން ރާއްވަވާފައިވާ އެއްވެސް މަޝްރޫޢެއް މަޑުޖައްސާލުމުގެ ވިސްނުމެއް ނުގެންގުޅުއްވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ވިދާޅުވެފައެވެ.

ތަރައްޤީގެ މަޝްރޫޢުތަކަށް ގާތްގަނޑަކަށް ޕީ.އެސް.އައި.ޕީ ބަޖެޓުން 10 ބިލިއަން ރުފިޔާ ކަނޑައަޅާފައިވާއިރު، އޭގެތެރެއިން ގިނަ މަޝްރޫޢުތަކަކީ ލައިން އޮފް ކްރެޑިޓް، އެލް.އޯ.ސީގެ ތެރެއިން ލޯން ހަމަޖެހިފައިވާ މަޝްރޫޢުތަކެވެ. އަދި ޕީ.އެސް.އައި.ޕީގެ އާއްމު ބަޖެޓުން ކުރުމަށް ނިންމާފައިވާ މަޝްރޫޢުތައްވެސް މަޑުޖެހުމެއްނެތި ކުރިއަށްދާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.