ރަށުގެ ވެއްޓަކީ އަމާން ތަނަކަށް ހެދުމަށް މަސައްކަތް ކުރުމަށް ރ. އަތޮޅު ފުލުހުންނަށް ކޮމިޝަނަރ އޮފް ޕޮލިސް މުހައްމަދު ހަމީދު އިލްތިމާސްކުރައްވައިފި އެވެ.
އެމަނިިކުފާނު މި ކަމަށް އިލްތިމާސްކުރެއްވީ ރ. ހުޅުދުއްފާރުގައި ގާއިމުކުރި ޕޮލިސް ޕޯސްޓު ހުޅުވައިދެއްވާ ހޮނިހިރު ދުވަހު އެ ރަށުގައި ބޭއްވި ރަސްމިއްޔާތެއްގައެވެ.
ހުޅުދުއްފާރު ޕޮލިސް ޕޯސްޓު ހުޅުވައި ދެއްވީ އެކަމަށްޓަކައި އެ ދުވަހު ބޭއްވި ރަސްމިއްޔާތުގައި މިނިސްޓަރ އޮފް ހޯމްއެފެއާޒް އައްޝައިހް އިމްރާން އަބްދުﷲ އާއި ކޮމިޝަނަރ އޮފް ޕޮލިސް މުޙައްމަދު ހަމީދުއެވެ.
އެ ރަސްމިއްޔާތު ފެށުމުގެ ގޮތުން، މޯލްޑިވްސް ޕޮލިސް ސަރވިސްގެ ނޯތު ޕޮލިސް ރީޖަނަލް ކޮމާންޑަރުގެ ޑެޕިއުޓީ އެއްގެ މަގާމުގައި ހުންނެވި ޗީފް އިންސްޕެކްޓަރ އޮފް ޕޮލިސް އަލްމަރުހޫމް އިސްމާޢީލް ނަދީމްގެ ހަނދާނުގައި އެއް މިނެޓުގެ ހަމަހިމޭން ވަގުތުކޮޅެއް ގެނެސްފައިވެއެވެ.
އެ ރަސްމިއްޔާތުގައި މިނިސްޓަރ އޮފް ހޯމްއެފެއާޒް އިމްރާން ޢަބްދުﷲ ދެއްކެވި ވާހަކަފުޅުގައި، 2021 ވަނަ އަހަރާ ހަމައަށް އައި އިރު ކުށްތައް ހިނގުމުގެ ނިޒާމާއި އުސޫލުތަކަށް ބަލާއިރު ރާއްޖެ މިއޮތީ އަދިވެސް ރައްކާތެރިކޮށް ސަލާމަތްތެރިކޮށްކަމުގައި ވިދާޅުވިއެވެ. އަދި ދުނިޔެއަށް އަންނަމުންދާ ބަދަލުތަކާއެކު ރާއްޖެއަށްވެސް ބަދަލުތަކެއް އަންނަމުންދާ ކަމާއި ހާއްސަކޮށް މަސްތުވާތަކެއްޗާއި އެ ތަކެތީގެ ނަތީޖާއެއްގެ ގޮތުން ދެން އުފެދިގެންދާ އެހެނިހެން ކަންކަން ފެތުރިގެން ދިއުން އެއީ މިއަދު އެންމެންނަށްވެސް އެންމެ ތަކުލީފު ބޮޑުވެފައިވާ ކަންތައްކަމުގައި ފާހަގަކުރެއްވިއެވެ. އަދި ރަށްރަށުގައި ފުލުހުން ގާއިމުކުރުން އެއީ އެފަދަ ކަންކަމުން އަރައިގަތުމަށް ރައްޔިތުން ބޭނުންވާނެ ކަމެއްކަމުގައި ފާހަގަކުރެއްވިއެވެ.
އޭގެ އިތުރުން، ފުލުހުންގެ ލީޑަރޝިޕުން ފުލުހުންގެ މަސައްކަތްތަކަށް ވަރަށް ބޮޑެތި ބަދަލުތަކެއް ގެންނަމުންދާ ކަމާ، އެގޮތުން ރައްޔިތުންނާ ގާތުން ރައްޔިތުންނާ ގުޅިގެން އެކުވެރިކޮށް މަސައްކަތްކުރުމުގެ ވިސްނުމުގައި ފުލުހުން މަސައްކަތްކުރަމުންދާ ކަމުގައި ފާހަގަކުރެއްވިއެވެ. އަދި އަވައްޓެރި ފުލުހުންގެ ފަލްސަފާއަކީ އޭގެ ތެރެއިން، ރައްޔިތުންނާ ކޮންމެ ދުވަހަކު ދިމާވާ ކަންކަން ރައްޔިތުންނާ އެކުގައި ތިބެގެން މަޝްވަރާ ކުރެވިގެން، ހާއްސަކޮށް މުއައްސަސާތަކާ އެކުގައި ވަކިކަހަލަ ޓީމްތަކާއި ގުރޫޕުތައް ހެދިގެން ދެވިގެންދާނެ ހިދުމަތެއް ކަމުގައި ފާހަގަކުރެއްވިއެވެ.
މީގެ އިތުރުން، ރަސްމިއްޔާތުގައި ކޮމިޝަނަރ އޮފް ޕޮލިސް މުޙައްމަދު ހަމީދު ދެއްކެވި ވާހަކަފުޅުގައި، ހުޅުދުއްފާރުގައި ގާއިމުކުރި ޕޮލިސް ޕޯސްޓަކީ ފުލުހުންގެ ހިދުމަތުގެ އައު ގާނޫނުގައިވާ ކަންކަން ހާސިލުކޮށް އަމާޒަށް ވާސިލުވުމަށް ކުރިއަށް އެޅުނު އިތުރު ފިޔަވަޅެއްކަމުގައި ވިދާޅުވިއެވެ. އަދި 2019 ވަނަ އަހަރު ފުލުހުންގެ ސްޓްރެޓީޖިކް ޕްލޭން ކަނޑައެޅި އިރު އިސްކަންދޭނެ ހަ ކަމެއް ކަނޑައަޅާފައިވާއިރު އޭގެ ތެރޭގައި ލޯކަލް ޕޮލިސިންގ ކަނޑައަޅާފައިވަނީ އަތޮޅުތެރޭގައި ފުލުހުން ގާއިމުވެ ދެމުން ގެންދާ އަދި ކުރިއަށް އޮތް ތަނުގައި ދޭންފަށާނެ ހިދުމަތްތަކަށް އިތުރު އަހަންމިއްޔަތުކަމެއް ދިނުމުގެ މަގުސަދުގައިކަން ފާހަގަކުރެއްވިއެވެ. އަދި އުނގޫފާރު ފުލުހުން ހުޅުދުއްފާރަށް އައިސް ރައްޔިތުންނަށް ދެމުން އައި ހިދުމަތް މިއަދު ހުޅުވުނު ޕޮލިސް ޕޯސްޓާއެކު ނިމުމަކަށް އައިސްފައިވާ ކަމާއި މިއަދުން ފެށިގެން ހުޅުދުއްފާރުގެ ރައްޔިތުންނަށް ފުލުހުންގެ ހިދުމަތް ފޯރުކޮށްދެވޭނީ ރައްޔިތުންނާ ވަރަށް ގާތުން ކަމުގައި ވިދާޅުވިއެވެ.
މީގެ އިތުރުން، ރަށުގައި ހިންގާ ކުށްތަކާއި ރަށަށް ތައާރަފުވުމުގެ ފުރުސަތު އޮތް ކުށްތަކާއި އެ ކުށްތަކާ ގުޅޭ ކަންބޮޑުވުމާއި ބިރުވެރިކަމުން ރަށުގެ މުޖުތަމައު ސަލާމަތްކޮށް ރައްކާތެރިކަން ދެމެހެއްޓުމަށްޓަކައި ރަށުގައި ފުލުހުން ގާއިމުވެ ތިބުން ވަރަށް މުހިންމު ކަމުގައި ފާހަގަކުރެއްވިއެވެ. އަދި ޕޮލިސް ޕޯސްޓެއް ރަށުގައި ގާއިމު ވެފައިހުރުމުން، ރަށުގައި ހިންގާ ކުށުގެ އަމަލުތަކަށް ފާރަވެރިވެ އެ ކުށްތައް ހުއްޓުވުމަށް، އަތޮޅުގައި ގާއިމުވެފައިވާ ފުލުހުންގެ ޓީމުތަކާއެކު މަސައްކަތްކުރުމާއި ރައްޔިތުންނާއެކު ގާއިމުކުރެވޭ ގުޅުމުގެ ތެރެއިން ފުލުހުންގެ މަގުސަދުތައް ހާސިލުކުރުމަށް ކޮންމެ ދުވަހަކު ރަށުގައި ތިބެގެން މަސައްކަތްކުރެވިގެންދާނެ ކަމުގައި ފާހަގަކުރެއްވިއެވެ. އަދި ފުލުހުން ތިބުމުން، ރަށުގެ އިޖުތިމާއި އަދި އިގުތިސޯދީ ތަރައްގީއަށް ރަށުގެ ރައްޔިތުން ކުރަމުންދާ މަސައްކަތަކަށް އިތުރު ފަސޭހަތަކެއް ވެގެންދާނެ ކަމުގައިވެސް ފާހަގަ ކުރެއްވިއެވެ.
ރައްޔިތުންނާ ގުޅިގެން ރައްޔިތުންގެ އެއްބާރުލުމާއެކު ގާނޫނުތައް ނަގަހައްޓައި ފުލުހުންގެ ހިދުމަތް ފޯރުވައިދިނުން އެއީ މިއަދު ދިވެހި ފުލުހުންގެ ހިދުމަތުން ވަރަށް އިސްކަމެއްދޭންޖެހޭ ކަމެއް ކަމުގައި ފާހަގަކުރެއްވިއެވެ. އަދި ރައްޔިތުންނާއި މުއައްސަތަކާއި ޖަމިއްޔާ ޖަމާއަތްތަކާ ގުޅިގެން، ރަށުގެ ވެއްޓަކީ އަމާން ތަނަކަށް ހެދުމަށް މަސައްކަތްކޮށްދިނުމަށް ރ. އަތޮޅު ފުލުހުންގެ ކިބައިން އެދިލައްވައި އެކަމަށް އިލްތިމާސްކުރެއްވިއެވެ. އަދި ހުޅުދުއްފާރުގައި ފުލުހުން ތިބިކަމުގެ އިހުސާސް ކޮންމެ ދުވަހަކުމެ ރައްޔިތުންނަށް ކުރާނެފަދަ ގޮތަކަށް މަސައްކަތް ކުރިއަށް ގެންދިއުމަށް އެދިލެއްވިއެވެ. އަދި ފުލުހުން ކުރަމުންގެންދާ މަސައްކަތުގައި އަތުގުޅާލައިގެން މަސައްކަތް ކޮށްދިނުމަށް ރަށުގެ ރައްޔިތުންގެ ކިބައިން އެދިލެއްވިއެވެ. އަދި ކުށްމަދު ކުރުމާއި މުޖުތަމައުގެ އަމާންކަން ގާއިމުކޮށް ރައްކާތެރިކަން ދެމެހެއްޓުމަކީ ހަމައެކަނި ފުލުހުންގެ މަސައްކަތުން ވާނެކަމެއް ނޫންކަމާއި އެއީ ފަރުދީ ހައިސިއްޔަތުންވެސް އަދި ޖަމާއަތެއްގެ ގޮތުގައިވެސް އެންމެން ގުޅިގެން އަދާކުރަންޖެހޭ ޒިންމާއަކާއި މަސްއޫލިއްޔަތެއްކަމުގައި ފާހަގަ ކުރެއްވިއެވެ.
ހުޅުދުއްފާރު ޕޮލިސް ޕޯސްޓު ހުޅުވުމުގެ ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ޢަލީ ރަޝީދު އާއި ނޯތު ޕޮލިސް ރީޖަން ކޮމާންޑަރ ޗީފް ސްޕްރިންޓެންޑެންޓް އޮފް ޕޮލިސް މޫސާ އަލީ އާއި ރައްޔިތުން މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު އާއި ފުލުހުންގެ ސީނިއަރ ބައެއް އޮފިސަރުންނާއި ރ. އަތޮޅު ކޮމާންޑަރާއި ރަށު ކައުންސިލާއި އެހެނިހެން މުއައްސަސާތަކާ އަދި ރަށުގެ ރައްޔިތުންނާއި ފުލުހުން ބައިވެރިވެލެއްވިއެވެ.
ހުޅުދުއްފާރު ޕޮލިސް ޕޯސްޓު ހުޅުވައި ދެއްވުމަށްފަހު މިނިސްޓަރ އޮފް ހޯމް އެފެއާޒް އާއި ކޮމިޝަނަރ އޮފް ޕޮލިސް ވަނީ ޕޮލިސް ޕޯސްޓު ބައްލަވައިލައްވާފައެވެ.
