ރ. އަތޮޅުގެ ދެ ސްކޫލަކަށް ޕްރިންސިޕަލުން ހޯދަން ތަޢުލީމާއި ބެހޭ ވުޒާރާ (މިނިސްޓްރީ އޮފް އެޑިޔުކޭޝަން) އިން އިޢުލާންކޮށްފިއެވެ.

އެ ވުޒާރާ އިން ޕްރިންސިޕަލުން ހޯދަނީ، ރ. ފައިނު އަދި ރ. މަޑުއްވަރީ ސްކޫލަށެވެ.

އެ ވުޒާރާ އިން ދިވެހި ސަރުކާރުގެ ގެޒެޓްގައި ކުރި އިޢުލާނެއްގައި ފައިނު އަދި މަޑުއްވަރީގެ އިތުރުން 11 ސްކޫލަކަށް ޕްރިންސިޕަލުން ހޯދަން ބޭނުންވާ ކަމަށް ބުނެފައި ވެއެވެ. އެއީ ހއ. ވަށަފަރު ސްކޫލް، ހއ. ބާރަށު ސްކޫލް، ހދ. ހިރިމަރަދޫ ސްކޫލް، ށ. ގޮއިދޫ ސްކޫލް، ނ. ކެނދިކުޅުދޫ ސްކޫލް، ނ. މަގޫދޫ ސްކޫލް، އދ. ފެންފުށި ސްކޫލް، މ. ރަތްމަންދޫ ސްކޫލް، ތ. ހިރިލަންދޫ ސްކޫލް، ގއ. ކޮނޑޭ ސްކޫލް، އަދި ގދ. ވާދޫ ޖަމާލުއްދީން ސްކޫލް އެވެ.

މި ވަޒީފާ އަށް ކުރިމަތިލާ ފަރާތްތަކުން 10 ނޮވެމްބަރުގެ 13:30ގެ ކުރިން ވަޒީފާއަށް އެދި ހުށަހަޅަން ޖެހެއެވެ. ހުށަހަޅާ ލިޔުންތައް މިނިސްޓްރީންނާއި މިނިސްޓްރީގެ އީމެއިލް މެދުވެރިކޮށް ވެސް ބަލައިގަތުމަށް ވަނީ ހަމަޖެހިފައެވެ.

ރ. މަޑުއްވަރީ ސްކޫލަށް ޕްރިންސިޕަލަކު ހޯދަން އިޢުލާން ކޮށްފައި މިވަނީ، މަޑުއްވަރީ ސުކޫލުގައި ޕްރިންސިޕަލަކު ނެތި ހަ މަސް ދުވަސް ފާއިތުވެފައިވާ ސަބަބު ސާފުކުރުމަށް އެޑިޔުކޭޝަން މިނިސްޓަރު ޑރ. އައިޝަތު އަލީ މަޖިލީހަށް ހާޒިރުކޮށްގެން ސުވާލުކުރަން ހުށަހަޅުއްވައިފައިވާ ދަނޑިވަޅެއްގަ އެވެ.

މިނިސްޓަރާ ސުވާލުކުރެއްވުމަށް ހުށަހެޅުއްވީ މަޑުއްވަރީ ދާއިރާގެ މެންބަރު އަދި އެޑިޔުކޭޝަން މިނިސްޓްރީގެ ކުރީގެ ސްޓޭޓް މިނިސްޓަރު އާދަމް ޝަރީފް އުމަރު އެވެ.

އާދަމް ޝަރީފް މަޖިލީހަށް ފޮނުއްވާފައިވާ ސުވާލުގައި ވިދާޅުވެފައިވަނީ މިއަހަރު ކުރީކޮޅުން ފެށިގެން މަޑުއްވަރީ ސްކޫލު ހިންގަނީ ޕްރިންސިޕަލަކު ނެތި ކަމަށެވެ. އެހެންވެ އާދަމް ޝަރީފް އެދިވަޑައިގެންފައިވަނީ ޕްރިންސިޕަލެއް ނުލިބިގެން އުޅޭ ސަބަބަކާއި، ޕްރިންސިޕަލެއް ލިބޭނެ ތާރީހަކާ އަދި ޕްރިންސިޕަލުން ނުލިބޭ ރަށްރަށް ނުވަތަ ޕްރިންސިޕަލުން ހަރުލުން ދަތި ރަށްރަށާ މެދު ރާއްވަވާ ގޮތްތަކަކީ ކޮބައިތޯ އޮޅުންފިލުއްވުމަށެވެ.

އާދަމް ޝަރީފް ފަހުން ކުރެއްވި ޓްވީޓެއްގައި ވިދާޅުވީ މިއަހަރުގެ މެއި މަހުން ފެށިގެން މަޑުއްވަރީ ސްކޫލުގައި ޕްރިންސިޕަލަކު ނެތް ކަމަށާއި އެއީ ވަރަށް ކަންބޮޑުވާ ކަމެއް ކަމަށެވެ.

”ބައެއް ރަށްރަށަށް ހާޑްޝިޕް ހާއްސަ އިނާޔަތެއް ހަމަޖައްސައިގެން ނަމަވެސް ރަނގަޅު ޕްރިންސިޕަލުން ތިބޭނެ ގޮތެއް ކޮންމެހެން ހަދަންޖެހޭ. އަދި ބައެއް ރަށްރަށުގައި ޕްރިންސިޕަލް ހަރުނުލާ މައްސަލަ ބަލަންޖެހޭ،“ އާދަމް ޝަރީފް ވިދާޅުވެފައިވެ އެވެ.

މަޑުއްވަރީ ސްކޫލު ހިންގުމާ މިވަގުތު ހަވާލުވެ ހުންނެވީ އެ ސްކޫލުގެ ލީޑިން ޓީޗަރު އަހްމަދު ޝަކީބް އެވެ.