ރ. ވާދޫގައި ސިއްޚީ މަރުކަޒެއް ބިނާކޮށް ޚިދުމަތްދޭން ފެށިތާ މިއަދަށް 14 އަހަރު ފުރިއްޖެއެވެ.

ސަރުކާރުން ވާދޫގައި ބިނާކުރި ”ރ. ވާދޫ ސިއްޚީ މަރުކަޒު“ ރަސްމީކޮށް ހުޅުވާފައި ވަނީ 8 ނޮވެމްބަރު 2008ގައި ރައީސް މައުމޫން އަބްދުލް ޤައްޔޫމްގެ ވެރިކަމުގައެވެ. ރ. ވާދޫ ސިއްޚީ މަރުކަޒު ހުޅުވައިދެއްވީ އެކަމަށްޓަކައި ބޭއްވުނު ރަސްމިއްޔާތެއްގައި އޭރު ރ. އަތޮޅުގެ އަތޮޅު ވެރިޔާގެ މަޤާމުގައި ހުންނެވި ހުސައިން ރަޝީދެވެ.

ވާދޫ ސިއްޚީ މަރުކަޒުގެ ޚިދުމަތަށް 14 އަހަރު ފުރުން ފާހަަގަކުރުމަށް ގިނަ ހަރަކާތްތަކެއް ހިންގުމަށް ވަނީ ހަަމަޖެހިފައެވެ. މިގޮތުން، މި ހަރަކާތްތައް ފެށުމަށް މިއަދު ހެނދުނު ދިދަނެގުމުގެ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ރަށުގެ އެކިއެކި މުވައްސަސާތަކުގެ އިސްވެރިން ނުވަތަ އެބޭފުޅުންގެ މަންދޫބުން ބައިވެރިވެވަޑައިގަތެއެވެ.

މިއީ ކޮވިޑް-19ގެ ބަލިމަޑުކަމާއި ގުޅިގެން ދެ އަހަރު ދުވަހުގެ މެދުކެނޑުމަކަށް ފަހު ވާދޫ ސިއްޚީ މަރުކަޒުގެ އަހަރީ ދުވަސް ފާހަގަކުރާ ފުރަތަމަ ފަހަރެވެ.

ވާދޫ ސިއްޚީ މަރުކަޒަށް 14 އަހަރު ފުރުނު އިރު، މީގެ ކުރީގެ ސަރުކާރުތަކުން މާ ބޮޑު އަޅާލުމެއް ދީފައި ނުވާ އެމަރުކަޒަށް އަދުގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ދަނީ ގިނަ ކަންތައްތަކެއް ކޮށްދެމުންނެވެ. މިސަރުކާރުން ވަނީ ސިއްޚީ މަރުކަޒުގެ އިިމާރާތް ބޮޑުކުރުމުގެ މަޝްރޫއެއް ހިންގާފައިވެއެވެ.