ކައުންސިލްތައް މިންކުރުމުގެ ގޮތުން ލޯކަލް ގަވަރމަންޓް އޮތޯރިޓީ (އެލްޖީއޭ)އިން އެކުލަވާލާފައިވާ ކައުންސިލްތަކުގެ ޕާފޯމަންސް އިންޑެކްސް ދައްކާ ގޮތުން، 2021ވަނަ އަހަރުވެސް ރ. ވާދޫ ކައުންސިލްގެ ޕާފޯމަންސް ދަށްކަން ހާމަވެއްޖެއެވެ.
ވާދޫ ނިސްބަތްވާ ރ. އަތޮޅުން ވާދޫ ކައުންސިލަަށް ލިބިފައިވަނީ 5 ވަނައެވެ. މިއީ 2020ވަނަ އަހަރާ އަޅާ ކިޔާއިރު 3 ދަރަޖައިގެ ކުރި އެރުމެކެވެ. 2020ވަނަ އަހަރު އެ ކައުންސިލް އޮތީ 8ވަނައިގައެވެ.
ކައުންސިލްތަކުގެ ޕާފޯމަންސް އިންޑެކްސް 2021 ދައްކާ ގޮތުން، ވާދޫ ކައުންސިލް އޮތީ މުޅި ރާއްޖޭގެ 92ވަނައިގައެވެ.
އެނގުން މުހިއްމު: އެލްޖީއޭން އާންމު ކޮށްފައިވާ ކައުންސިލްތަކުގެ ޕާފޯމަންސް ރިޕޯޓް 2019-2020ގައި ވާ ގޮތުން، ރ. އަތޮޅުގެ ރޭންކިންގައި 2019ވަނަ އަހަރު ވާދޫ ކައުންސިލް އޮތީ 3ވަނައިގައެވެ. ނަމަވެސް 2020ވަނަ އަހަރު އެ ކައުންސިލް ވަނީ 8ވަނައަށް ވެއްޓިފައެވެ. އަދި 2021ވަނަ އަހަރު ކުރި އެރުން ހޯދައި އަތޮޅުގެ 5ވަނަ ހޯދާފައިވެއެވެ.
2016 އަދި 2017ވަނަ އަހަރު ވާދޫ ކައުންސިލަށް ރ. އަތޮޅުގެ އެއް ވަނަ ލިބިފައިވެއެވެ. އޭގެ ފަހުން، ކައުންސިލްގެ ހިންގުން ވަރަށް ބޮޑަށް ދޯދިޔާ ވެފައިވާކަން ފާހަގަކުރެވެއެވެ. އެކަން ޕާފޯމަންސް އިންޑެކްސްއިން ހާމަވެއެވެ.
ވާދޫ ކައުންސިލް ފާހަގަކުރެވެނީ ރައްޔިތުންގެ ޚިޔާލާއި މަޝްވަރާ ލިބިގަތުމެއް ނެތި ރަށުގެ މުހިންމު ގިނަކަންކަން ނިންމާ ކައުންސިލެއްގެ ގޮތުގައެވެ. އަދި 3ވަނަ ދައުރުގެ ކައުންސިލް ފާހަގަކުރެވުނީ ގާނޫނީ ގޮތުން ލާޒިމުކުރާ ރައްޔިތުންގެ ބައްދަލުވުންތައްވެސް ގަވާއިދުން ބާއްވާފައިނުވާ ކައުންސިލެއްގެ ގޮތުގައެވެ.
މީގެ ކުރިން ރަނގަޅު ޕާފޯމަންސްއެއް ދެއްކި ނަމަވެސް ކައުންސިލްގެ ހިންގުން ދޯހަޅިވުމުން ގިނަ ބައެއްގެ ފާޑުކިޔުން ވަނީ އެ ކައުންސިލަށް އަމާޒުވެފައެވެ.
ފެށުނީއްސުރެ ވާދޫގައި ކައުންސިލްގައި ތިއްބަވަނީ ޕީޕީއެމްއަށް ނިސްބަތްވެވަޑައިގަންނަވާ ބޭފުޅުންނެވެ.
