އާންމުންގެ ބޮޑު މަގުބޫލު ކަމެއް ހޯދި ދިވެހި ފިލްމު ”ހައްދު“ގެ ”ގިރިޓީ ލޯބިން“ ވީޑިއޯ ލަވަޔަށް ގިނަ ބައެއްގެ ތަރުހީބާއި ތައުރީފު އޮހުނެވެ.

ލަވައިން ޖުމުލަކޮށް ފެންނަނީ، ބޭންޑަކުން މިއުޒިކް ކުޅެމުންދާއިރު، ވަށައިގެން ކުލަ ބޮކިން ޒީނަތްތެރިކޮށްފައިވާ މާހައުލެއްގައި، ކަނބަލުންތަކެއް ފަރިފަރި ނެށުމެއް ހުށަހަޅާ މަންޒަރެވެ. ނެށުން ލީޑުކުރަނީ ބަތަލާ ނުޒުހަތު ޝުއައިބު (ނުޒޫ)އެވެ. މަރިޔަމް އަޝްފާގެ އަޑުން ރެކޯޑުކޮށްފައިވާ ”ގިރިޓޯ ލޯބިން“ގެ ޒަމާނީ ވާޝަންއަށް އެ ހިތްގައިމު ހުށަހެޅުން ހުށަޙަޅާފައިވަނީ މާޅޮސްމަޑުލު އުތުރުބުރީ ވާދޫގެ ބޮޑުމަގު ”އަމީނީމަގު“ ގައެވެ.

ޑައިރެކްޓަރު އަބްދުލް ފައްތާހުގެ ވަދާއީ ފިލްމު ”ހައްދު“ ގެ ބޮޑުބައި ޝޫޓްކޮށްފައިވަނީ ރ، ވާދޫގައެވެ. ފިލްމުގެ 60 އިންސައްތަ މަންޒަރަކީ ވާދޫގެ ހިތްގައިމު މާހައުލުގެ މަންޒަރުތަކެވެ.
”ހައްދު“ ގެ ލަވަތަކުގެ މިއުޒިކް ހަދާފައި ވަނީ ފަތޯގެ އިތުރުން ކުޑައިއްބެ، މިސްޓީ އަދި ކުޑަ ޝިޔާމެވެ. ހުރިހާ ލަވައެއްގެ ޅެންތައް ހަދާފައި ވަނީ (ތޭރަވާ)އެވެ.

ލަވަތައް ކިޔާފައި ވަނީ ތޭރަވާ އާއި އަޝްފާގެ އިތުރުން އެ މީހުންގެ ދަރިފުޅު އަލްސަން މުހައްމަދު (އަލް)އެވެ.

މަހުދީ އަހުމަދުގެ ސްކްރީންޕްލޭއަކަށް ޝިބާންއާއި ރިޝްފާ އަދި އައްޒަ ލީޑް ރޯލް ކުޅެފައިވާ ފައްތާހްގެ 12 ވަނަ ފީޗާ ފިލްމު ”ހައްދު“ ވަނީ މާލެއާއި އަތޮޅުތެރޭގެ ގިނަ ރަށްތަކެއް އިތުރުން ބައެއް ރިސޯޓުތަކުގައި ދައްކާފައެވެ.

2017 ވަނަ ނެރުނު މިފިލްމަކީ މިފަހުގެ ތާރީޚެއްގައި އެންމެ ބޮޑު މަގުބޫލުކަމެއް ލިބުނު އެއް ފިލްމެވެ.

ފިލްމުގެ މަންޒަރުތައް ސާފުވެފައި ކޮލިޓީއެވެ. ޑަބްކުރުމުގެ ބަދަލުގައި ސަރައުންޑް ސައުންޑް (5.1 ސައުންޑް) އިން އަޑު ނަގާފައި ހުރުމުން އަޑު އަހާލަން ފަސޭހަވެފައި އޮމާނެވެ.