މާޅޮސްމަޑުލު އުތުރުބުރިން އެންމެ އުތުރަށް އޮންނަ ރ. އަލިފުށްޓަކީ ހިތްހެޔޮ ރައްޔިތަކު ދިރިއުޅޭ، މެހެމާނުންނަށް ކަމޭހިތުމުގައި ނަމޫނާ ރަށެކެވެ.
އަތޮޅުގެ ނިސްބަތުން ތަރައްގީގެ ދުވެލި ހަލުއި ރަށެކެވެ. އެރަށުގައި އެއާޕޯޓެއް އެޅުމުގެ މަޝްރޫއެއް ސަރުކާރުން އަންނަނީ ހިންގަމުންނެވެ.
މިރަށަކީ ރާއްޖޭގައި ކިއްސަރު ވަޑާމަށް ވަރަށް މަޝްހޫރު ރަށެކެވެ. ޚާއްޞަކޮށް، ބޯޓުފަހަރު ބަނުމަކީ މި ރަށުގެ ޚާއްޞަ މަސައްކަތެކެވެ. ރާއްޖޭގައި ބަނދެފައިވާ މަސްދޯނި ފަހަރާ ކަނޑުގައި ދުއްވާ 80 އިންސައްތަ އުޅަނދަކީ މިރަށު މަސައްކަތްތެރީންގެ ހިއްސާ އޮވެގެން ބަނދެފައިވާ އުޅަނދުފަހަރެވެ.
އާމްދަނީ ހޯދުމަށް ކުރާ މަސައްކަތްތަކުގެ ތެރޭގައި މަސްވެރިކަމާއި އިމާރާތް ކުރުމާއި މަސް ކައްކައި ހިއްކުމާއި ފަންގިވިނުމާއި ރޯނު ވެށުމާއި ގޯތި ތެރޭގައި ދަނޑުވެރި ކަމުގެ ބާވަތްތައް ހެއްދުމާއި ފެހުމުގެ މަސައްކަތް ހިމެނެއެވެ.
