ށ. ފުނަދޫއަށް އަނެއްކާ ވެސް ގުޑުގުޑާ ދޫނިތައް އައިސްފިއެވެ.

ފުނަދޫގެ ފޮޓޯގްރާފަރު، ތަންނި ވަނީ އޭނާގެ ފޭސްބުކް ޕޭޖުގައި ދޫނިތަކުގެ ރީތި ވީޑިއޯއެއް ޕޯސްޓުކޮށްފައެވެ.

ރ. ވާދޫ ލައިވްއާ، ވާހަކަދައްކަމުން ފުނަދޫ ރައްޔިތަކު ބުނީ، މި ދޫނިތައް އެރަށަށް އައިސްފައިވަނީ މިއަދުގެ ފަތިހުގެ ވަގުތެއްގައެވެ. މިފަހަރުވެސް ދޫނިތައް އައިސްފައިވަނީ މީގެކުރިންވެސް ދޫނިތައް އައިސް އުޅުނު އެރަށުގެ ދަށްފަޅު، ލޮނު ކުޅިއަށެވެ.

އަހަރުގެ މެދު ތެރެއަކީ މި ދޫނިތައް ރާއްޖޭގެ ކުޅި ހުންނަ ރަށްރަށަށް ހިޖުރަކުރާ ދުވަސްވަރެކެވެ. ރާއްޖެއަށް އެ ސޮރުމެންގެ ހިޖުރައިގެ މޫސުން ޖެހި އިރު މި އަހަރު ފުރަތަމަ ގުޑުގުޑާ ދޫންޏެއް މި ފެނުނީ ފުނަދޫގެ ކުޅި ސަރަހައްދުންނެވެ.

މީގެ ކުރިން 2022 ވަނަ އަހަރު މެދު ތެރެއާއި 2021 ވަނަ އަހަރުގެ މެދު ތެރެއިން ވެސް ފުނަދޫން ގުޑުގުޑާ ދޫނި ފެނިފައިވެ އެވެ. އެހެން ހިޖުރަ ކުރާ ބައެއް ދޫނިތައް ވަރަށް ދުވަސްވަން ދެން އެ ރަށްރަށުގައި މަޑުކުރާކަން ވެސް ފާހަގަވެފައިވެއެވެ.