ރ. ވާދޫ ގޭބިސީތަކުގައި ހުރި ކަރަންޓު މީޓަރުތައް ސްމާޓް މީޓަރަށް ބަދަލުކުރުމުގެ މަސައްކަތް ވާދޫ ފެނަކަ ބްރާންޗުން ފަށައިފިއެވެ.
ވާދޫ ފެނަކަ ބްރާންޗުން ބުނީ، މިމަހުގެ 27 ވަނަ ދުވަހު މިމަސައްކަތް ފަށާފައިވާތީ، މިމަސައްކަތް ކުރިއަށްގެންދާ ވަގުތުތަކުގައި، އެ މަސައްކަތް ކުރިއަށްގެންދާ ގޭބިސީތަކުން ކަރަންޓުގެ ޚިދުމަތް މެދުކެނޑިދާނެ ކަމަށެވެ. ކަރަންޓުގެ ޚިދުމަތް މެދުކެނޑޭނީ 15 މިނިޓަށް ކަމަށާއި މީޓަރު ބޯޑުގެ ހާލަތަށް ބަލައި މަސައްކަތަށް އިތުރު ވަގުތު ހޭދަކުރަންޖެހޭ ނަމަ އިތުރު ވަގުތަށްވެސް ކަރަންޓުގެ ޚިދުމަތް ކަނޑާލަން ޖެހިދާނެ ކަމަށް ފެނަކަ ވާދޫ ބްރާންޗުން ވަނީ ބުނެފައެވެ.
ކުރިއަށް އޮތް ދެތިން އަހަރު ތެރޭގައި ރާއްޖޭގެ ހުރިހާ ރަށެއްގައިވެސް ޑިޖިޓަލް ސްމާޓް މީޓަރ ބޭނުންކޮށްގެން ކަރަންޓު ބޭނުންކުރެވޭ މިންވަރު ބެލޭނެ ނިޒާމެއް ޤާއިމުކުރެވޭނެކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވަނީ ވިދާޅުވެފައެވެ. ވަޒީރު ޠާރިޤު މިހެން ވިދާޅުވީ ދ. ކުޑަހުވަދޫގެ ހުރިހާ ގޭބިސީއެއްގައި ބޭނުންކުރާ ކަރަންޓު މީޓަރުތައް ޑިޖިޓަލް ސްމާޓް މީޓަރަށް ބަދަލުކުރުމަށް ކުރިއަށްގެންދިޔަ މަޝްރޫޢުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކުޑަހުވަދޫގައި ޑިޖިޓަލް ސްމާޓް މީޓަރު ހަރުކޮށް ބޭނުންކުރަން ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވީ، ގޭބިސީތަކުގައި ޑިޖިޓަލް ސްމާޓް މީޓަރު ހަރުކުރުމަށް ކުރިއަށްގެންދެވުނު މަޝްރޫއަކީ ރާއްޖޭގެ ހަކަތައިގެ ސިނާޢަތަށް ގެނެވުނު އިންޤިލާބީ ކުރިއެރުމެއްކަމަށެވެ.
ވަޒީރު ވިދާޅުވީ ކުރިއަށް އޮތް ދެތިން އަހަރުގެ ތެރޭގައި ރާއްޖޭގެ ހުރިހާ ރަށެއްގައި ޑިޖިޓަލް ސްމާޓް މީޓަރު ހަރުކޮށް ނިމި ބޭނުންކުރަން ފެށުމާއެކު، ކަރަންޓު އެންމެ ގިނައިން ބޭނުންކުރެވޭ ގަޑިތައް އެނގޭނެކަމަށެވެ. އަދި ގޭބިސީތަކުގައާއި ރަށުގެ ކޮންމެ ސަރަޙައްދެއްގައި ކަރަންޓުގެ މައްސަލައެއް ދިމާވިނަމަވެސް އެނގޭނެކަމަށް ވިދާޅުވިއެވެ. މިއީ ކަރަންޓު ހެޔޮގޮތުގައި ބޭނުންކުރުމަށް ލިބޭ ބާރެއްކަމަށާއި މިމަޝްރޫޢު އެއްކޮށް ނިމޭއިރު ކަރަންޓުގެ އަގުހެޔޮވާނެ ކަމަށް ވަޒީރު ވިދާޅުވިއެވެ.
ހަކަތައާ ބެހޭ ވަޒީރު ވިދާޅުވީ ޑިޖިޓަލް ސްމާޓް މީޓަރު ހަރުކުރުމަކީ ސަރުކާރުން ޚާއްސަ އިސްކަމެއް ދެއްވާ މަޝްރޫޢެއްކަމަށެވެ. އެގޮތުން ފެނަކައާއި ސްޓެލްކޯއިން ކަރަންޓުގެ ޚިދުމަތް ދެމުންދާ ރަށްރަށުގައި މިމަޝްރޫޢު ކުރިއަށް އޮތް ދެތިން އަހަރުގެ ތެރޭގައި ނިންމުމަކީ އަމާޒެއްކަމަށެވެ. އަދި ހުރިހާ ރަށެއްގައި މިނިޒާމު ޤާއިމުކުރެވުމާއެކު ކަރަންޓު ބޭނުންކުރާ މިންވަރު ބެލުމަށްފަހު ”ޓައިމް އޮފް ޔޫސް ޓެރިފް“ ތަޢާރަފްކުރެވޭނެކަމަށް ވިދާޅުވިއެވެ. މިއާއެކު ގޭބިސީތަކުގައި ކަރަންޓު މަދުން ބޭނުންކުރާ ގަޑިތަކަށް ޚާއްސަކޮށްގެން އަގު ހެޔޮ ބޭންޑުތަކެއް ތަޢާރަފްކޮށް ކަރަންޓު ގިނައިން ބޭނުންކުރާ ފަރާތްތަކަށް ފޯރުކޮށްދިނުމުގެ ޚިދުމަތްވެސް ފެށޭނެކަން ވަޒީރު ފާހަގަކުރެއްވިއެވެ.
ފެނަކައިގެ ޚިދުމަތްތައް ޑިޖިޓަލް ކުރުމުގެ މަޝްރޫޢުއަކީ ރައީސް އިބްރާހީމް މުހައްމަދު ޞާލިޙްގެ ސަރުކާރުގެ މަޝްރޫއެކެވެ.
