އެއްބަސްވުމެއްނެތި ރަށުގެ އެކި ސަރަހައްދު ތަކުގައި ބޭނުންކުރާ ބިންތަކުގެ މައުލޫމާތު ނެގުމަށް މާޅޮސްމަޑުލު އުތުރުބުރީ އަލިފުށީ ކައުންސިލުން އާންމު އިއުލާނެއް ކޮށްފިއެވެ.
އެ އިއުލާނުގައި ބުނީ އެއްބަސްވުމެއްނެތި ރަށުގެ އެކި ސަރަހައްދު ތަކުގައި ވިޔަފާރި އުސޫލުންނާއި، އަމިއްލަ ބޭނުންތަކަށް ބޭނުންކުރަމުންދާ ބިންތަކާއި، ހަރުގެ / ބިން ބޭނުންކުރަމުންދާ ފަރާތްތަކުން 2025 އޭޕްރީލް 6 ވާ އާދިއްތަ ދުވަހުގެ ކުރިން އަލިފުށީ ކައުންސިލްގައި ނޯޓު ކުރުމަށް ދަންނަވާ ކަމަށެވެ. އަދި ދެންނެވުނު ތާރީޚުން ފެށިގެން އެބިންތައް ސާފުކުރުމަށްފަހު 1 މަސް ދުވަހުގެ ތެރޭގައި އެ ކައުންސިލަށް އެކަން ލިޔުމުން އަންގާ ކައުންސިލާއި ބިން ހަވާލުކުރުމަށް ދަންނަވާ ކަމަށެވެ.
މި މުއްދަތުގެ ތެރޭގައި ބިން ހުސްކޮށް ކައުންސިލާއި ހަވާލު ނުކުރެވޭނެނަމަ، ނުކުރެވޭ ސަބަބު ބަޔާންކޮށް 2025 އޭޕްރީލް 10 ވާ ބުރާސްފަތި ދުވަހުގެ 14:00 ގެ ކުރިން ލިޔުމުން އެކަން އަންގަން ވެސް އެ ކައުންސިލުން ވަނީ އެދިފައެވެ.
2025 އޭޕްރީލް 6 ގެ ކުރިން ނޯޓު ނުކުރާ ބިންތަކާއި، 1 މަސް ދުވަހުގެ ތެރޭގައި ބިންސާފުނުކޮށް އަދި ސަބަބާއެކު އެކަން ލިޔުމުން އެކައުންސިލަށް ނާންގާ އެންމެހާ ބިންތަކުގައިވާ މުދަލާއި ތަކެތި، އެއީ ވެރިއެއް ނެތް ތަކެތިކަމަށް ކަނޑައަޅާ މި ތަކެތި ނީލަމުގައި ވިއްކާލާ ނުވަތަ ނައްތާލުމުގެ މަސައްކަތް ކުރިއަށް ގެންދާނެ ކަމަށް ވެސް އަލިފުށީ ކައުންސިލުން ބުންޏެވެ.
މި ބިންތަކުގައި އެއްވެސް ބާވަތެއްގެ މަސައްކަތެއް ކުރުމުގެ ފުރުޞަތު ނުދީ މަސައްކަތް ހުއްޓުވުމުގެ ބާރު އެ ކައުންސިލަށް ލިބިގެން ވެއެވެ.
މަސައްކަތް ހުއްޓުވުމާއި ތަންހުސްކުރުމުގެ މަސައްކަތުގެ މަރުހަލާގައި މުދަލަށް ލިބިދާނެ ގެއްލުމަކާއި، މާލީ ގޮތުންވެސް ލިބިދާނެ އެއްވެސް ގެއްލުމަކާއި އަދި އެނޫންގޮތަކުންވެސް ލިބިދާނެ ގެއްލުމަކަށް އަލިފުށީ ކައުންސިލް ޒިންމާނުވާނެ ކަމަށްވެސް އެ ކައުންސިލުން ބުންޏެވެ.
ބިމުގެ މައުލޫމާތު ނޯޓުކުރާ ލިންކް: https://forms.gle/rH5Wpy3QP7a8w2V87
