އެންމެ ފުރަތަމަ ދުވަހުން ފެށިގެން އަންހެންކުއްޖާގެ އާއިލާގެ އެއްވެސް މީހަކު، އޭނާ ލޯބިން ގުޅުނު ފިރިހެންކުއްޖާއާ އޭނާ ރައްޓެހިވެގެން އުޅުމަކީ އެމީހުން އެއްގޮތަކަށްވެސް އެކަމާ ރުހި ޤަބޫލުކަމެއް ނޫނެވެ. ހަމައެކަނި ނުރުހޭ ސަބަބަކީ، އެ ފިރިހެންކުއްޖާ ނިސްބަތްވާ އާއިލާއެވެ.
އަންހެންކުއްޖާގެ އާއިލާ މީހުން ދެކޭ ގޮތުގައި އެ ފިރިހެންކުއްޖާ އާއި ގުޅިގެން އެކުގައި އޭނާ އުޅެން ޤަޞްތުކޮށްފިނަމަ މުޅި ޙަޔާތުގައި އޭނާޔަށް ކުރިމަތިލާން ޖެހޭނީ ދާއިމީ ހިތްދަތިކަމާ ހިތާމަ ތަކާއެވެ. އަންހެންކުއްޖާގެ އާއިލާ މީހުންގެ ފަރާތުން، އޭނާ މިގުޅުން ކުރިއަށް ގެންދާތީ ކުރިމަތިލާން ޖެހިފައިވާ ނުރުހުމާއި ނަފުރަތުގެ ސަބަބުން، ދެ ކުދިންގެ މެދުގައި ދެބަސްވުންތައް އުފެދި، ވަރަށް ގިނައިން ޒުވާބުކުރެއެވެ. އެއީ ކުރިމަތި ވަމުންދާ ތަފާތު ފިއްތުންތަކުގެ ސަބަބުން އަންހެންކުއްޖާގެ ސިކުނޑިއަށް އެކަންތައް އޮބިނޯވެގެން ކުރެވޭކަމެކެވެ. އަންހެންކުއްޖާ ރައްޓެހިވެގެންއުޅޭ ފިރިހެންކުއްޖާދެކެ އޭނާ ވަރަށް ލޯބިވެއެވެ. އެހެންކަމުން، އެ ފިރިހެންކުއްޖާ އޭނާދެކެ ލޯބިވަނީ ކިހާވަރަކަށްތޯ ވަރަށް ގިނައިން ސުވާލުކޮށް އަހައިހަދައެވެ. މި ފިރިހެންކުއްޖަކީ އޭނާގެ ހިތުގެ ޝުޢޫރުތައް މާފުރިހަމަކޮށް ޢިޝްޤީ ޖާޒުބީ ބަސްތަކުން ހާމަކޮށްދޭން ދަންނަ ކުއްޖެއް ނޫނެވެ. އޭނާ ކުރާ ކަމަކީ، އަންހެންކުއްޖާ އެސުވާލު ކުރުމުން ރުޅިއަންނަ ޒާތުގެ ޖަވާބެއް ދިނުމެވެ. މިކަންތައް މިހެން ވަމުން ދިއުމުންނާއި، އަދި، އާއިލާ މީހުންގެ ތެރެއިން އަންހެންކުއްޖާއަށް ކުރިމަތިވާ އިތުރު ޕުރެޝަރގެ ސަބަބުން، އޭނާގެ ޠަބީޢަތަށް ބަދަލުއައިސް އިތުރު ހިތްހަމަ ނުޖެހުން ހިތުގައި އުފެދިގެން ދެއެވެ. މި ހިތްހަމަނުޖެހުމުގެ ހުރިހާ ވަރެއް ބާލަނީ އެ ފިރިހެންކުއްޖާއަށެވެ. އޭނާ ވެފައިވަނީ އަންހެންކުއްޖާ އަންނަ ނަފުރަތާ ރުޅި ރައްދުކުރަން ހުރި ފަރާތަށެވެ. ފިރިހެންކުއްޖާ މިކަމާ މެދުގައި އެއްވެސް ޝަކުވާއެއް ނުކޮށް އަންހެންކުއްޖާ އެކަން އެހެން ކުރުމުގެ ފުރުޞަތު ހުންނަނީ ދީގެންނެވެ. މިކަންތައް މިގޮތަށް މި ދެކުދިންގެ މެދުގައި ހިނގަމުން ޙަޔާތުގެ ދުވަސްތައް ދައުރުވަމުންދެއެވެ.
ފިރިހެންކުއްޖާ ޔުނިވަރސިޓީ ތަޢުލީމު ފުރިހަމަކޮށް ސެޓުފިކެޓް ލިބިއްޖެއެވެ. ސެޓުފިކެޓް ލިބުމުން އޭނާ ގަސްތުކުރީ އަލުން އިތުރަށް ތަޢުލީމު ޙާޞިލުކުރަން އެހެން ޤައުމަކަށް ފުރައިގެން ދާށެވެ. ފުރައިގެން ދިއުމުގެ ކުރިން، އޭނާ ލޯބިވާ އަންހެން ކުއްޖާއަށް ލޯބި ހުށަހެޅުމަށް ނިންމައިފިއެވެ.
އޭނާ އެ އަންހެންކުއްޖާޔަށް ލޯބި ހުށަހަޅަމުން ބުނެފިއެވެ. ” އަހަރެންނަށް މާފަށުވިކޮށް ލޯބީގެ ޢިބާރާތްތަކުން ލޯބި ހުށަހަޅާކަށް ނޭނގެއެވެ. އެކަމަކު، އަހަރެންނަށް އެނގޭ އެއްކަމެއް އެބައޮތެވެ. އެކަމަކީ އަހަރެން ކަލޭދެކެ ނިހާޔަތަށް ލޯބިވާކަމެވެ. ކަލޭ އެކަން ޤަބޫލު ކުރާ ކަމުގައިވާނަމަ، އަހަރެން މިހުރީ މުޅި ޙަޔާތުގައި އޯގާތެރިކަމާ ލޯތްބާ އެކުގައި ކަލޭ ގޮވައިގެން އެކުގައި ދުނިޔެ އުޅޭށެވެ. ކަލޭގެ އާއިލާ މީހުންގެ ހިތުގައި އަހަރެންގެ މައްޗަށް އުފެދިފައިވާ ނަފުރަތާއި މެދުގައި ބުނަމެވެ. އަހަރުމެން ދެމީހުންގެ މިގުޅުމަށް އެމީހުންގެ ރުހުން ހޯދަން ކުރެވެންހުރި ހުރިހާ ކަމެއް އަހަރެން ކުރާނަމެވެ. އަހަރެންގެ މި ހުށަހެޅުން ބަލައިގަނެ، އަހަރެންނާ އިންނަން ޤަބޫލުވާށެވެ.” ފިރިހެންކުއްޖާގެ މިހުށަހެޅުން އަންހެންކުއްޖާ ނުހަނު އުފަލުން ރުހި ޤަބޫލުކޮށްފިއެވެ. އަދި، ފިރިހެންކުއްޖާގެ ފަރާތުން ފެންނަމުންދާ ހިތްވަރާ، ޢަޒުމާ، ކެތްތެރިކަން ފެނި، އަންހެންކުއްޖާގެ އާއިލާގެ ރުހުން އެމީހުންނަށް ލިބިއްޖެއެވެ. އެންމެފަހުން، ފިރިހެންކުއްޖާ ޤައުމުން ފުރައިގެން ކިޔަވަން ދިއުމުގެ ކުރިން ކައިވެނި ކުރުމަށް އިޤުރާރުވުމުގެ ޙަފުލާ ބާއްވައި އެކަންތައް ނިންމައިފިއެވެ. އެކަންތައް ނިންމައި އަންހެންކުއްޖާ އޭނާގެ ރަށަށް އެނބުރި އައިސް، މަސައްކަތުގެ މައިދާނަށް ނުކުމެއްޖެއެވެ.
ފިރިހެންކުއްޖާ ޤައުމުން ބޭރުގައި ތަޢުލީމު ޙާޞިލް ކުރަމުން ދެއެވެ. ދެމީހުން ދިރިއުޅެމުންދާ ދެ ޤައުމަށް އިރުއަރާ އިރުއޮއްސޭ ވަގުތުގެ ތަފާތު ކިތަންމެ ބޮޑު ނަމަވެސް ދެމީހުންގެ ގުޅުން ފޯނު ކުރުމުންނާއި، ދެފަރާތުން ބަދަލުކުރެވޭ ސިޓީބިޓީން ހަމަޖައްސަމުން ގެންދެއެވެ. ދެ މީހުންގެ ގުޅުމަށް ކުޑަވެސް ބުރުލެއްއެރިއަ ނުދިނުމަށް ކުރެވެންހުރި ހުރިހާ ކަމެއް ކުރަމުންދެއެވެ.
އެއްދުވަހަކު، އަންހެންކުއްޖާ ވަޒީފާ އަދާކުރާ އޮފީހަށް ދިޔުމަށް އާދައިގެމަތިން ބަސްދަތުރު ނެގުމަށްދާ ބަސްހުއްޓިއަށް އޭނާ ދަނިކޮށް، ވަރަށް ބާރަށް ދުއްވާފައިއައި ކާރެއް، ދުއްވަންއިން މީހާއަށް ކާރު ކޮންޓްރޯލު ނުކުރެވިގެން އައިސް އަންހެންކުއްޖާގެ ގައިގައިޖެހި އެކުސިޑެންޓް ވެއްޖެއެވެ. ކާރުން ޖެހުނުލެއް ބާރުކަމުން އަންހެންކުއްޖާ އޮތީ ބުރުއަޅާފައިގޮސް މަގުގެ އަނެއް ފަރާތުގައެވެ. އޭނާ ހޭއެރީ ހޮސްޕިޓަލުގައި އޮއްވައެވެ. އޭރު އޭނާ އޮތް އެނދުގެ ކައިރީގައި އޭނާގެ މައިން ބަފައިން ތިއްބެވެ. އެހިނދު އޭނާޔަށް ކުރެވުނު އިހުސާސަކީ އެކުސިޑެންޓުގައި އޭނާޔަށް ވަރަށް ބޮޑަށް އަނިޔާ ލިބުންކަމާ އެހެނަސް ނަޞީބުގައި ތަންހުރީތީ މަރުނުވެ ސަލާމަތްވިކަމުގެ އުފާވެރި އިހުސާސެވެ.
އެނދުގައި އޮވެ އޭނާގެ މައިން ބަފައިންގެ މޫނަށް ބަލައިލުމުން ފެނުނީ އެމީހުންގެ ލޯތައް ކަރުނުން ފުރިފައިވާތަނެވެ. މަންމަޔާ ބައްޕަގެ ހިތަށް ފިނިކަމެއް ގެނެވޭތޯ އޭނާ މަސައްކަތް ކުރަންފަށައިފިއެވެ. އެކަމަކު، އެކަމެއް ނުކުރެވުނެވެ. އޭނާގެ ދުލުން ބަހެއް ނުބުނެވުނެވެ. އޭނާގެ ދުލުން ބަހެއް ބޭރުވޭތޯ ވަރަށް މަސައްކަތްކޮށް އެކަން ކާމިޔާބެއް ނުވިއެވެ. ހަމައެކަނި އެއްވެސް އަޑެއްނެތި އަނގައިން ނޭވާ ބޭރުވުން ފިއަވައި އެހެންކަމެއް ނުކުރެވުނެވެ. އޭނާގެ ދޫ ވަނީ ބަންދުވެފައެވެ. ޑަކުޓަރ ވިދާޅުވި ގޮތުގައި، ވާހަކަ ދެއްކުމުގެ ޙިއްސުވަނީ އެކުސިޑެންޓުގައި އޭނާގެ ސިކުނޑިއަށް ލިބުނު ގެއްލުމުގެ ސަބަބުން ހަލާކުވެފައެވެ. އެހެންކަމުން، އޭނާގެ މުޅި ޙަޔާތުގައި ދެން އުޅެން ޖެހޭނީ މަންމަނެއްގެ ގޮތުގައެވެ. މަންމަ އާއި ބައްޕަގެ ބާރުއެޅުމާއެކު ދުލުން ބަހެއް ބުނެވޭތޯ އެތައް މަސައްކަތެއްކޮށް ވެސް އެކަން ކާމިޔާބެއް ނުވިއެވެ. އެންމެ ލަފުޒެއްވެސް ދުލުން ބޭރެއް ނުވިއެވެ. އެންމެފަހުން އޭނާ އަނބުރައިގަނެއްޖެއެވެ. އެތައްއިރެއް ވަންދެން ހެއިނެތިފައި އޮތުމަށްފަހު އޭނާ ހެއިއަރައިފިއެވެ. ހެއިއެރުމަށްފަހު އެދުވަހުގެ ބާކީއޮތްބައި އޭނާ ވޭތުކުރީ އަޑު ބޭރުނުވާ ގިސްލުމާ ރުއިމުގައެވެ. އަބަދުވެސް ރޮވެނީއެވެ. ކުރިމަތިވި އިއާދަ ނުކުރެވޭނެ ހިތާމަޔާ ހިތްދަތި ކަމުގެ ބޮޑުކަމުންނެވެ.
އަންހެންކުއްޖާއަށް ފަރުވާ ދިނުމަށްފަހު ހޮސްޕިޓަލުން އޭނާ ދޫކޮށްލައިފިއެވެ. ގެއަށް އެނބުރި އައިސް އޭނާ އުޅެމުން ދެއެވެ. ހުރިހާކަމެއްވެސް ކުރިއެކޭ އެއްގޮތެވެ. އެންމެކަމެއް ފިއަވައެވެ. އެއީ ފޯނު ރިންގުވާ އަޑު ފިއަވައެވެ. ފޯނު ރިންގުވާ އަޑު މިހާރު އޭނާއަށް ވެފައިވަނީ ވަރަށްބޮޑު ބިރަކަށެވެ. ގޭގެ ފޯނަށް ކޯލަކަށްފަހު ކޯލެއްގެ ރިންގު އަންނަމުން ދެއެވެ. އެކަމުން އޭނާގެ ހިތުގެ ވޭނާ އުދާސްތައް ދަނީ އިތުރު ވަމުންނެވެ. ކެތްކުރަން ދަތިވަމުންނެވެ. ފޯނުކުރަނީ އޭނާގެ ލޯބިވެރިޔާކަން އެނގެއެވެ. އެކަމަކު، ދައްކަންބޭނުން އެއްވެސް ވާހަކައެއް އޭނާގެ ލޯބިވެރިޔާ ގާތުގައި ބުނާނީ ކިހިނެއް ހެއްޔެވެ. ބުނެވޭކަށް ނެތެވެ. ދޫވަނީ ބަންދުވެފައެވެ. އެފިރިހެން ކުއްޖާއަށް ޖެހުނު އުނދަގުލަކަށް ވާކަށް އޭނާ އެއްގޮތަކަށްވެސް ނޭނދެއެވެ.
އެކަމަށް ކެތްކުރަން ދަތިވުމުން އެންމެފަހުން، އޭނާގެ ލޯބިވެރިޔާއަށް ސިޓީއެއް ލިޔެ ފޮނުވައިފިއެވެ. އެ ސިޓީގައި އޭނާއަށް އިތުރަށް ދިގު އިންތިޒާރު ކުރެވެން ނެތްކަމަށާ، އަދި ދެމީހުންގެ މެދުގައި އުފެދިފައިވާ ލޯބީގެ ގުޅުން އިތުރަށް އެންމެ ދުވަހަކުވެސް ބާއްވަން އޭނާ ބޭނުން ނުވާކަމަށްބުނެ ލިޔެފައި ފޮނުވައިފިއެވެ. އެ ސިޓީ އާއި އެކުގައި އެންގޭޖުމެންޓް އަނގޮޓިވެސް ފިރިހެންކުއްޖާއަށް އަނބުރައި ފޮނުވައިފިއެވެ. ފިރިހެންކުއްޖާގެ ފަރާތުން މެދުނުކެނޑި އަންނަ ސިޓީތަކާ ފޯނު ކޯލުތަކަށް ކުރިމަތިލުމަކީ އޭނާއަށް ކެތްކުރެވޭ ވަރުގެ ކަމަކަށް ނުވެއެވެ. އޭނާއަށް ހަމައެކަނި ކުރެވޭ ކަމަކީ، އެކަމުން ކުރާ އަސަރުން ދެލޮލުން ކަރުނަ އޮހޮރައޮހޮރައި ހިތާމައިގައި ރޭދުވާ ގުނަމުން ގެންދިއުމެވެ.
އަންހެންކުއްޖާގެ ބައްޕައަށް އޭނާގެ ދަރިފުޅު އުފުލަމުންދާ ވޭނީ ހިތާމަތައް ފެނިފައި، އާއިލާ ގޮވައިގެން އެހެން ހިސާބަކަށް ދިރިއުޅުން ބަދަލުކުރުމަށް އޭނާ ގަސްތުކޮށްފިއެވެ. އެހެނީ، ދިރިއުޅޭ ތަނުގެ މާޙައުލު ބަދަލުވުމުން އަންހެން ދަރިފުޅު ކުރަމުންދާ ފިކުރުތަކާ ޚިޔާލުތަކުން އެކަހެރިވެ، އުފާވެރިކަމާ އެކުގައި ދިރިއުޅެން ފަށާފާނެ ކަމުގެ އުންމީދު ކުރެވޭތީއެވެ. އެނިންމުމާ އެއްގޮތަށް އާއިލާ ގޮވައިގެން ދިރިއުޅުން އެހެން ހިސާބަކަށް ބަދަލުކޮށްފިއެވެ. ދިރިއުޅޭ މާޙައުލު ބަދަލުކުރި ފަހުން، އަންހެންކުއްޖާ މަޑުމަޑުން އިޝާރީބަހުރުވަ ދަސްކުރަން ފަށައިފިއެވެ. އޭނާ ނުހަނު ލޯބިވާ ފިރިހެންކުއްޖާގެ ހަނދާންތައް ހިތުން ފުހެލުމަށް އޭނާގެ ނަފުސަށް އަމުރުކުރަމުން ބާރުއަޅަމުންދެއެވެ. ޙަޔާތުގެ ދުވަސްތައް ދައުރުވަމުން މާޒީގެތެރެއަށް ވަންނަމުންދެއެވެ.
އެއްދުވަހަކު، އަންހެންކުއްޖާގެ އެންމެގާތް ރަޙުމަތްތެރިޔާ އޭނާ ގާތުގައި އެ ފިރިހެންކުއްޖާ އޭނާގެ ތަޢުލީމު ނިންމައި ރަށަށް އެނބުރި އައުމަށްފަހު، އޭނާ ހޯދަމުންދާ ވާހަކަ ބުނެފިއެވެ. އެވާހަކަ ބުނުމުން އޭނާ އުޅޭ ތަނެއް އެ ފިރިހެންކުއްޖާ ގާތުގައި އެއްގޮތަކަށްވެސް ނުބުނުމަށާ، އަދި އޭނާ މަތިން މުޅިން ހަނދާން ނައްތައިލުމަށް އެ ފިރިހެންކުއްޖާއަށް ނަސޭހަތް ދިނުމަށް ރަޙުމަތްތެރިޔާ ގާތުގައި ބުނެފިއެވެ. އެކަންތައް އެހެން ހިނގި ފަހުން އަހަރެއްހައި ދުވަސް ފާއިތުވެގެން ހިނގައްޖެއެވެ. އެ ފިރިހެންކުއްޖާގެ އެއްވެސް ޚަބަރެއް ނުލިބެއެވެ. އެގޮތުގައި ދުވަސްތައް ދަނިކޮށް، އަންހެންކުއްޖާގެ އެންމެގާތް ރަހުމަތްތެރިޔާ އެއްދުވަހަކު އެގެއަށް އައިސް، އެ ފިރިހެންކުއްޖާ މީހަކާ އިންނަން އުޅޭ ވާހަކަ އަންހެންކުއްޖާ ގާތުގައި ބުނެފިއެވެ. އަދި، އެ ކައިވެނީގެ ދަޢުވަތު ކާޑު ވެސް އޭނާގެ އަތަށް ދީފިއެވެ. ދަޢުވަތު ކާޑު އަތަށް ލިބުމުން ވަރަށް އަސަރާ އެކުގައިހުރެ ކާޑު ހުޅުވައިލައިފިއެވެ. ކާޑު ހުޅުވައި ބަލައިލުމުން ފެނުނީ އޭނާގެ ނަމެވެ.
އަންހެންކުއްޖާއަށް ލިބުނު އުފަލުން އެ ފިރިހެންކުއްޖާ މިހާރުވީ ކޮންތާކުތޯ އަހައި ސުވާލުކުރި ވަގުތު ފިރިހެންކުއްޖާ އެތަނަށް އަތުވެއްޖެއެވެ. އެތަނަށް އައިސް، އިޝާރީބަހުރުވައިން ބުނެފިއެވެ. ” އަހަރެން އިޝާރީބަސް ދަސްކުރުމަށް އެއް އަހަރު ދުވަސް ހޭދަކުރީމެވެ. މިކަންތައް އަހަރެންކުރީ، އަހަރެން ކަލާޔަށްވި ވަޢުދު ފުއްދުމަށެވެ. އެ ވަޢުދަކީ ކަލާގެ މަތިން އަހަރެން ދުވަހަކުވެސް ހަނދާންނެތި ނުކުރާނެކަމަށް ބުނެ ވީވަޢުދެވެ. އަހަރެންނަށް ކަލާ ފުރުޞަތުދޭށެވެ. ކަލާގެ އަޑު ކަމުގައި އަހަރެން ވާނަމެވެ. އެ ގޮތުގައި އަބަދަށް ދެމިހުންނާނަމެވެ. އަހަރެން ކަލާދެކެ ނުހަނު ލޯބިވެއެވެ.”
މިވާހަކަތައް، ލަސްލަހުން އިޝާރީބަހުން އަންހެން ކުއްޖާޔަށް ކިޔައިދިނުމަށް ފަހު، އަންހެންކުއްޖާ އޭނާޔަށް އަނބުރާ ފޮނުވި އެންގޭޖުމަންޓް އަނގޮޓި އަންހެންކުއްޖާގެ އިނގިލީގައި އަލުން އަޅުވައިފިއެވެ.
ދުނިޔޭގެ ޙަޔާތުގައި ކުރިމަތިލާންޖެހޭ ތަފާތު ގޮންޖެހުންތަކުގައި ފިނޑިޔަކަށް ވެގެން ފަސްނުޖެހޭށެވެ. ހަނދާން ބަހައްޓަންޖެހޭ ކަމަކީ، ކޮންމެ ކަމަކަށްވެސް ޙައްލެއް އޮންނާނެކަމެވެ. އެއްވެސް މީހެއްގެ ހިތް ހަލާކޮށް ނުލާށެވެ. އެހެނީ، ތިބާއަށް އެފަދަ ކަމެއް ދިމާވާނީ ކޮންއިރަކުން ކަމެއް ޚުދު ތިބާއަށް ވެސް ނޭނގޭނެ ތީއެވެ
