ރ. ވާދޫ ސްކޫލްގައި މިއަހަރު ބޭއްވި އިނާމްދިނުމުގެ ޖަލްސާގައި ދަރިވަރުން ހުށަހަޅައިދިން މަރުހަބާއާއި ޝުކުރުގެ އައިޓަމަށް ސޯޝަލްމީޑިއާގައި ބޮޑު ސަމާލުކަމެއް ލިބިއްޖެއެވެ.

މިއައިޓަމްގެ ވީޑިއޯ ސޯޝަލްމީޑިއާގައި މިހާރު ދައުރުވަމުން އަންނައިރު މިހާތަނަށް ފޭސްބުކް އަދި ޓިކްޓޮކް މެދުވެރިކޮށް ޖުމުލަ ލައްކައަކަށް ވުރެ ގިނަ ފަހަރު މިވީޑިއޯ ވަނީ ބަލާފައެވެ.

ވާދޫ ސްކޫލްގެ އިސްދަރިވަރެއް ލިޔެ، ރ. އަލިފުށްޓަށް ނިސްބަތްވާ ކުޅަދާނަ ލަވަކިޔުންތެރިޔާ އަބްދުﷲ ޝާފިޢު (ޝާ) ކިޔާފައިވާ ލަވައަކަށް އެސްކޫލްގެ ދަރިވަރުންވަނީ ފަރިފަރި ނެށުމެއް ހުށަހަޅައިދީފައެވެ. ރ. އަލިފުށީ ޝާ ސްޓޫޑިއޯއިން ރެކޯޑްކޮށް ތައްޔާތުކުރި މިލަވައިގެ ލިރިކްސް ލިޔުނީ މިހާރު ވީޓީވީގައި މަސައްކަތްކުރާ، ވާދުއަށް ނިސްބަތްވާ ނޫސްވެރިޔާ އަދި ޓީވީ ޕްރެޒެންޓަރ ޒިދާން މުހައްމަދު ރިޔާޒްއެވެ.

ހަވާސާ، ރ. ވާދޫއަށް ނިސްބަތްވާ ޒިދާން ބުނެފައިވާ ގޮތުގައި ”މަރުޙަބާ ދަންނަވަން އަރިހަށް“ މިލަވަޔަކީ މިހާތަނަށް އޭނާއަށް ކުރެވުން އެންމެ ހިތްހަމަޖެހޭ ލަވައިގެ މަސައްކަތެވެ.

ލިރިކްސް ލިޔެ، ލަވަ ރެކޯޑްކޮށް، ސްކޫލަށް ފޮނުވީ ޒިދާންގެ ފަރާތުން ވާދޫ ސްކޫލަށް ދިން ހަދިޔާއެއްގެ ގޮތުގައި ކަމަށް 2016 ވަނަ އަހަރު ވާދޫ ސްކޫލުން ސާނަވީ ނިންމި ޒިދާން ބުނެފައިވެއެވެ.

އެސްކޫލްގެ ވައިސް ކެޕްޓަންގެ މަގާމުވެސް އަދާކޮށްފައިވާ ޒިދާން ބުނީ، އެލަވަ ވެދުންކުރީ، ވާދޫ ސްކޫލަކީ އެ ފުރާޅެއްގެ ހިޔަލުގައި ދަށު ސާނަވީ އަދި ސާނަވީ ތައުލީމީ ހަޔާތުގެ ދިހަ އަހަރު ހޭދަކުރި ނުހަނު ލޯބިވާ އެތައް ގޮތަކުން ހަޔާތާ ގުޅިފައިވާ ޢިލްމީ މަދަރުސާއަށް ވާތީ ކަމަށެވެ.

ވާދޫ ސްކޫލްގެ އިނާމްދިނުމުގެ ޖަލްސާގައި ވާހަކަދައްކަވަމުން އެ ސްކޫލްގެ ޕްރިންސިޕަލް އިސްމާއިލް ނަސީރުވަނީ ޒިދާންގެ މިމަސައްކަތް ފާހަގަކޮށް އޭނާއަށް ޝުކުރުއަދާކޮށްފައެވެ.

މި ނެށުމަށް ކުދިން ތައްޔާރުކުރީ ވާދޫ ސްކޫލްގެ ލޮބުވެތި މުދައްރިސުންނެވެ. އިސްވެ އުޅުނީ ޝާއިރާ މިސްއެވެ.

ލަވައިގެ އިތުރުން ނެށުމަށްވެސް ގިނަ ބަޔަކުވަނީ ތައުރީފުކޮށްފައެވެ.

2021-2022 ވަނަ ދިރާސީ އަހަރު މާޅޮސްމަޑުލު އުތުބުރީ ވާދޫ ސްކޫލުން ހުރިހާ ގޮތަކުން އެންމެ ރަނގަޅު ދަރިވަރަކަށް ހޮވިފައިވަނީ އައިމިނަތު ރަފާ ރައޫފްއެވެ.

2008 ވަނަ އަހަރު އޯލެވެލް އިމްތިޙާން ހަދަން ފެށި، ވާދޫ ސްކޫލަށް 2021-2022 ވަނަ ދިރާސީ އަހަރަކީ އެތައް ގޮތަކުން ހާއްސަ އަހަރެކެވެ. އެންމެ ބޮޑު ހާއްސަ ކަމަކީ، އެ މަދަރުސާގެ ތާރީޚުގައިވެސް ފުރަތަމަ ފަހަރަށް ދަރިވަރަކު މަތީ އަރުތަ ހާސިލުކޮށް، ގައުމީ ގަދަ ދިހައެއްގައި ހިމެނުމެވެ.

މި ތާރީޚީ ކާމިޔާބީ ވާދޫ ސްކޫލަށް ހޯދައިދިން ފަހުރުވެރިޔަކީ އެ މަދަރުސާއިން އައި.ޖީ.ސީ.އެސް.ސީ އިމްތިޙާން ހެދި އާމިނަތު ރަފާ ރައޫފްއެވެ. އޭނާވަނީ އޯލެވެލް އިމްތިޙާނުން، ފަސް ”އޭ ސްޓަރ“، އަދި ތިން ”އޭ“ ގެ ނަތީޖާއެއް ހާސިލުކޮށްފައެވެ. މި ނަތީޖާއާއެކު ރަފާ ގައުމީ ގަދަ ދިހައެއްގައި ހިމެނުނީ ހަތަރުވަނަ ދަރަޖައިގައެވެ.

ރަފާގެ އިތުރުން އިނާމްދިނުމުގެ ޖަލްސާގައި ވަނީ ނިމިދިޔަ އަހަރު ވާދޫ ސްކޫލުން އެކިއެކި ގޮތްގޮތުން އަރުތަ ހާސިލްކުރި ދަރިވަރުންނަށް އަރުތައިގެ އިނާމް ހަވާލުކޮށްފައެވެ. އަދި ޑިސްޓިންކްޝަން ހޯދި ޓީޗަރުންގެ އަގުވަޒަންކޮށްފައިވެއެވެ.

މީގެއިތުރުން، ސްކޫލްގެ އަހަރީ ރިޕޯޓާއި ދަރިވަރުންގެ ރީތި ހުށަހެޅުންތަކެއް ފެނިގެންދިޔައެވެ.

މި ޖަލްސާ ޝަރަފުވެރިކޮށްދެއްވުމަށް އެޑިޔުކޭޝަން މިނިސްޓްރީގެ ފަރާތުން ސީނިއަރ ޕޮލިސީ ޑިރެކްޓަރ ނައުޝާދު އިބްރާހީމް ވާދޫއަށް ވަޑައިގެން ޖަލްސާގައި ބައިވެރިވެވަޑައިގެންނެވިއެވެ. އަދި ވާދޫ ސްކޫލްގެ ޕްރިންސިޕަލް އިސްމާއިލް ނަސީރާއި އެ ސްކޫލްގެ އިސްވެރީންގެ އިތުރުން ރަށުގެ ބައެއް އިއްޒަތްތެރިނާއި ސްކޫލްގެ މުދައްރިސުންނާއި މުވައްޒަފުންނާއި ދަރިވަރުން އަދި ބެލެނިވެރިންވެސް ބައިވެރިވިއެވެ.