ބަނގުރަލުގެ މައްސަލައެއްގައި މީހަކު ހައްޔަރުކުރާ މަންޒަރު ފޮޓޯ ނެގި ނޫސްވެރިއެއްގެ ފޯނުން ފުލުހަކު އެ ފޮޓޯ ޑިލީޓްކުރުވި މައްސަލައެއް ދިވެހިބ ފުލުހުންގެ ޚިދުމަތުން ބަލަން ފަށައިފިއެވެ.
ފުލުހުންގެ ޚިދުމަތުން ބަލަނީ، ”އަސްލު ޓީވީ“ ގެ ނޫސްވެރިޔަކަށް ފުލުހަކު އިންޒާރުދީ، އޭނާ ނެގި ފޮޓޯއެއް ޑިލީޓުކުރުވި މައްސަލައެވެ.
”އަސްލު ޓީވީ“ގެ ވީޑިއޯ ޖާނަލިސްޓް ޝާމާ ޝުއައިބު ސޯޝަލްމީޑިއާގައި ކުރި ޕޯސްޓެއްގައި ބުނީ އާދީއްތަ ދުވަހުގެ ރޭ 8:26 ހާއިރު މަގުމަތީގައި މީހަކު ހައްޔަރުކޮށްގެން އުޅޭތީ ނޫސްވެރިއެއްގެ ހައިސިއްޔަތުން ދިޔައީ ޕްރެސް ކާޑު ހިފައިގެން ފޮޓޯއެއް ނަގަން ކަމަށެވެ.
”އެކަމަކު ހަމަ ފޮޓޯ ނެގިތަނާ ނޫކުލައިގެ ގަމީހެއްގަ ހުރި ފުލުހަކު އައިސް ފޮޓޯ ޑިލީޓުކުރަން އެންގި. ޕްރެސް ކާޑު ދެއްކީމަ އެވެސް ފޮޅާލާފަ ހަމަ ގަދަ ދައްކާލީ އެ ފޮޓޯ ޑިލީޓު ކުރުވަން،“ ނޫސްވެރިޔާ ބުނެފައިވެއެވެ.
އޭނ ބުނީ ހައްޔަރުކުރާ ހިސާބަށް ދިޔުމުން ފޮޓޯ ޑިލީޓްކުރަން ޖެހުނު ކަމަށެވެ.
”އެވަރުން ހިތްހަމަ ނުޖެހިގެން ފޯނު ބަލާ ފާސްކޮށް ރީސެންޓްލީ ޑިލީޓެޑްވެސް ހާވައިފި،“ ޝާމާ ބުނެފައިވެއެވެ.
މިކަމާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ކުށުގެ ވެށީގައި ފުލުހުން ހަރަކާތްތެރިވާއިރު އެ ތަނެއްގައި ފުލުހުން ކުރަމުންދާ މަސައްކަތަކީ އެ ހާލަތުގައި ހުރިހާ އެންމެންވެސް އެންމެ އިސްކަންދޭން ވާނެ ކަންތައް ކަމަށެވެ.
”ކޮންމެ ހާލަތެއްގައިވެސް ނޫސްވެރިންނަށް ކަނޑައެޅޭ ހިސާބެއްގައި ތިބެ މަންޒަރާއި މައުލޫމާތު ރައްޔިތުންނާއި ހަމައަށް ގެނަސްދިނުމަށް ދެވެން އޮތް އެންމެ ފުޅާ ފުރުސަތެއް ފުލުހުންވެސް ދޭންވާނެކަމަސްވެސް ދެކެން،“ ޝިފާން ވިދާޅުވިއެވެ.
ޝިފާން ވަނީ ނޫސްވެރިޔާ ރައްދުކޮށްފައިވާ ހާލަތަކީ ފުލުހެއްގެ ނުވަތަ ފުލުހުންތަކެއް އަމަލުކޮށްފައިވާ ގޮތާއިމެދު ހުށަހަޅާފައިވާ ޝަކުވާއެއް ކަމަށް ގަބޫލު ކުރެވޭތީ އެކަން އިތުރަށް ބެލުމަށް ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑާ ހިއްސާކުރާނެ ކަމަށް ވިދާޅުވެފަ އެވެ.
